फलटण : फलटण नगरपरिषदेतील विविध विषय समित्यांची निवड नुकतीच पार पडली असताना भाजपमध्ये अंतर्गत वाद उफाळून आल्याचे चित्र दिसत आहे. माजी नगरसेवक अनुप शहा यांनी पक्षाविरोधात घेतलेल्या भूमिकेमुळे त्यांच्या पक्षातून हकालपट्टीची शक्यता निर्माण झाल्याची माहिती खात्रीलायक सूत्रांकडून मिळत आहे.
नगरपरिषदेतील समित्यांच्या निवडीवरून नाराजी व्यक्त करत अनुप शहा यांच्या कन्या व नगरसेविका सिद्धाली शहा यांनी आपल्या समितीच्या सदस्यपदाचा राजीनामा दिला. या घटनेनंतर त्याच दिवशी अनुप शहा यांनी पत्रकार परिषद घेत पक्षाच्या निर्णयांवर टीका केली. त्यामुळे स्थानिक भाजपमध्ये अंतर्गत गटबाजी उघडपणे समोर येऊ लागली आहे.
अनुप शहा यांनी पक्षाविरोधात घेतलेली भूमिका आणि ज्येष्ठ नगरसेवकांवर केलेली टीका ही पक्षासाठी घातक असल्याचा आरोप काही नगरसेवकांकडून करण्यात येत आहे. त्यामुळे त्यांच्या विरोधात कठोर कारवाई करावी, अशी मागणी पक्षश्रेष्ठींकडे करण्यात आल्याची माहिती समोर येत आहे.
दरम्यान, पक्षातील अनेक पदाधिकाऱ्यांनीही शिस्तभंगाची कारवाई करण्याची मागणी जोर धरत असल्याचे सांगितले जात आहे. त्यामुळे आगामी काळात पक्ष नेतृत्व अनुप शहा यांच्याविरोधात काय निर्णय घेणार याकडे राजकीय वर्तुळाचे लक्ष लागले आहे.
