फलटण, दि. २० (प्रतिनिधी): गोड बोलून प्रेमाच्या जाळ्यात ओढत खोट्या गुन्ह्यात अडकवण्याची धमकी देत मारहाण करून खंडणी उकळणाऱ्या टोळीचा फलटण शहर पोलिसांनी पर्दाफाश केला आहे. या प्रकरणी एका महिलेसह १० संशयितांना अटक करण्यात आली असून त्यांच्याकडून तब्बल ३२ लाख ७२ हजार ८०९ रुपयांचा मुद्देमाल जप्त करण्यात आला आहे.
असे घडले प्रकरण
कापूरहोळ येथील व्यावसायिक आनंद काशिनाथ दळवी यांच्याशी दहा दिवसांपूर्वी फलटणमधील एका महिलेने मोबाईलवर संपर्क साधला. व्हॉट्सअॅप कॉलद्वारे ओळख वाढवत तिने त्यांना प्रेमाच्या जाळ्यात ओढले आणि फलटण येथे येण्यासाठी प्रवृत्त केले.
दि. १३ रोजी संबंधित महिलेने दळवी यांना फलटणमधील एका फ्लॅटवर बोलावले. तेथे आधीच कट रचून तिच्या साथीदारांनी दळवी यांना खोट्या बलात्काराच्या गुन्ह्यात अडकवण्याची धमकी दिली. शिवीगाळ, दमदाटी व मारहाण करत ४० लाख रुपयांची खंडणी मागण्यात आली.
संशयितांनी दळवी यांच्याकडून जबरदस्तीने १ लाख ९५ हजार रुपये रोख तसेच एटीएम व क्रेडिट कार्डच्या माध्यमातून रक्कम उकळली. त्यानंतर पुणे रस्त्याने सोडण्याच्या बहाण्याने नेत असताना त्यांच्या गळ्यातील सुमारे २० तोळे वजनाची अंदाजे ३० लाख रुपये किंमतीची सोन्याची चेन मारहाण करून हिसकावून घेतली.
तक्रारीनंतर पोलिसांची कारवाई
या घटनेनंतर आनंद दळवी यांनी फलटण शहर पोलीस ठाण्यात तक्रार दाखल केली. गुन्हे प्रकटीकरण विभागाच्या पथकाने तांत्रिक तपास, सीसीटीव्ही फुटेज आणि गुप्त माहितीच्या आधारे संशयितांचा माग काढला.
पोलिसांनी शिताफीने पुढील संशयितांना ताब्यात घेतले:
साहिल रवी तारे (दत्तनगर, फलटण),
वैभव बाळासो सस्ते (सस्तेवाडी, ता. फलटण),
रोहन नवीन काकडे (मंगळवार पेठ, फलटण),
विनायक बाळासो जाधव (ठाकुरकी, ता. फलटण),
राज राम बोके (मंगळवार पेठ, फलटण),
विजय दत्तु ननवरे (झिरपे गल्ली, मंगळवार पेठ, फलटण),
तुषार ऊर्फ गदया संजय ननावरे (झिरपे गल्ली, मंगळवार पेठ, फलटण),
सागर ऊर्फ टक्या मोहन साळुंखे (वीर, ता. पुरंदर),
राहुल रामचंद्र जगताप (कसबा पेठ, फलटण)
आणि एक महिला आरोपी.
तपासात या सर्वांचा गुन्ह्यात सहभाग स्पष्ट झाल्याने त्यांना अटक करण्यात आली आहे.
३२ लाखांहून अधिक मुद्देमाल जप्त
संशयितांकडून रोख रक्कम, दागिने, मोबाईल फोन, वाहने असा एकूण ३२ लाख ७२ हजार रुपयांचा मुद्देमाल हस्तगत करण्यात आला आहे. अटक केलेल्या आरोपींपैकी पाच जण सराईत गुन्हेगार असून त्यांच्यावर यापूर्वी विविध गंभीर गुन्हे दाखल असल्याची माहिती पोलिसांनी दिली.
पोलिसांचे मार्गदर्शन व पथक
ही कारवाई फलटणचे पोलीस उपअधीक्षक विशाल खांबे यांच्या मार्गदर्शनाखाली पोलीस निरीक्षक अरविंद काळे, सहाय्यक पोलीस निरीक्षक नितीन शिंदे, पोलीस उपनिरीक्षक दिनेश शिंदे, अयोध्या घोरपडे तसेच गुन्हे प्रकटीकरण विभागाच्या पथकाने केली.
फलटण शहर पोलिसांच्या या कारवाईमुळे हनी ट्रॅपच्या माध्यमातून खंडणी उकळणाऱ्या टोळीचा पर्दाफाश झाला असून व्यावसायिक व नागरिकांनी अनोळखी व्यक्तींशी संपर्क साधताना सावधगिरी बाळगावी, असे आवाहन पोलिसांनी केले आहे.
