नवीन वर्षाच्या स्वागतासाठी व्यसनमुक्तीचा संदेश; फलटणमध्ये अंनिस व समविचारी समितीचा जनजागृती उपक्रम

नवीन वर्षाच्या स्वागतासाठी व्यसनमुक्तीचा संदेश; फलटणमध्ये अंनिस व समविचारी समितीचा जनजागृती उपक्रम
फलटण प्रतिनिधी –
समाजामध्ये दिवसेंदिवस व्यसनांचे प्रमाण वाढत असल्याचे चित्र चिंताजनक बनत चालले आहे. विशेषतः नवीन वर्षाच्या सुरुवातीला तरुण वर्ग पार्टीच्या नावाखाली दारू, गुटखा यांसारख्या व्यसनांकडे वळत असल्याचे निदर्शनास येत आहे. या पार्श्वभूमीवर समाजात व्यसनमुक्तीबाबत जनजागृती व्हावी, या उद्देशाने महाराष्ट्र अंधश्रद्धा निर्मूलन समिती (अंनिस) व समविचारी मूलभूत अधिकार संघर्ष समिती यांच्या संयुक्त विद्यमाने फलटण येथील महात्मा फुले चौकात जनजागृती कार्यक्रमाचे आयोजन करण्यात आले होते.
या कार्यक्रमाची सुरुवात क्रांतीज्योती महात्मा ज्योतिराव फुले यांच्या प्रतिमेस पुष्पहार अर्पण करून करण्यात आली. यावेळी नागरिकांसह तरुण वर्गाने मोठ्या संख्येने उपस्थित राहून उपक्रमास उत्स्फूर्त प्रतिसाद दिला.
कार्यक्रमादरम्यान अंनिसच्या कार्यकर्त्यांनी “नवीन वर्षाच्या सुरुवातीला दूध प्या, पण दारू व गुटख्यासारखी व्यसने करू नका”, “व्यसनापासून दूर रहा आणि आपले जीवन सुंदर बनवा” अशा जोरदार घोषणा दिल्या. या घोषणांनी संपूर्ण परिसर दणाणून गेला असून नागरिकांचे लक्ष वेधून घेतले.
महात्मा फुले चौकात मोठ्या संख्येने जमलेल्या नागरिकांना व तरुणांना अंनिस व समविचारी मूलभूत अधिकार संघर्ष समिती यांच्या वतीने दूध वाटप करण्यात आले. अनेक नागरिकांनी या उपक्रमाचे कौतुक करत नवीन वर्षाची सुरुवात अशा सकारात्मक व सामाजिक संदेशाने झाल्याची भावना व्यक्त केली.
या जनजागृती कार्यक्रमास आनंद देशमुख (माजी उपविभागीय पोलीस अधिकारी), प्रशांत भुजबळ (माजी इन्कम टॅक्स अधिकारी), डॉ. दीपक शेंडगे, मंदाकिनी गायकवाड, अयान अत्तार, ज्योतीराम बोराटे, मोहिनी कुलकर्णी, आरती काकडे, जयवंत काकडे, पत्रकार बाळकृष्ण भगत, हनुमंत शिंदे, निलेश अहिवळे, प्रसाद शेंडगे, वसीम शेख, सुनील जाधव, बनसोडे सर, सोमनाथ नाळे आदी मान्यवर उपस्थित होते.
नवीन वर्षाच्या पार्श्वभूमीवर व्यसनमुक्त समाजनिर्मितीचा प्रभावी संदेश देणारा हा उपक्रम नागरिकांमध्ये चर्चेचा विषय ठरला आहे.