फलटण | प्रतिनिधी :फलटण नगरपालिकेच्या नूतन नगराध्यक्षपदी भाजपा–राष्ट्रवादीचे नगराध्यक्ष समशेरसिंह नाईक निंबाळकर यांनी अधिकृतपणे पदाचा स्वीकार करून आपल्या कार्याला सुरुवात केली. पदग्रहण सोहळ्यावेळी उपस्थितांना संबोधित करताना त्यांनी फलटण शहरातील सर्व नागरिकांना दर्जेदार नागरी सुविधा देण्यासाठी आपण कटिबद्ध असल्याचे स्पष्ट केले
नगराध्यक्ष नाईक निंबाळकर म्हणाले की, फलटण शहरातील रस्त्यांची सध्या मोठ्या प्रमाणात दुरावस्था झाली असून येत्या काळात रस्त्यांची कामे दर्जेदार पद्धतीने करण्यात येणार आहेत. तसेच शहरातील स्वच्छतेसाठी घनकचरा व्यवस्थापनाला प्रथम प्राधान्य देण्यात येईल. नागरिकांना वेळेवर आणि पुरेसा पाणीपुरवठा मिळावा यासाठी नगरपालिकेच्या वतीने विशेष प्रयत्न केले जातील. सर्वसामान्य जनतेवर कोणताही अन्याय होऊ न देता शहरात शांतता व सुव्यवस्था राखण्यावर भर दिला जाईल, असेही त्यांनी नमूद केले.
शहरातील व्यापाऱ्यांचे प्रलंबित प्रश्न तातडीने मार्गी लावले जातील. नागरिकांनी पाच वर्षांसाठी सेवा करण्याची दिलेली संधी आम्ही सोने करून शहराच्या मूलभूत सोयीसुविधांवर विशेष लक्ष देणार असल्याचा विश्वास त्यांनी व्यक्त केला.
या पदग्रहण सोहळ्याला माजी खासदार रणजीतसिंह नाईक निंबाळकर, आमदार सचिन पाटील, ज्येष्ठ नेते प्रल्हाद तात्या पाटील, माजी नगराध्यक्ष दिलीपसिंह भोसले, प्रतिभाताई शिंदे, डॉ. गुळवे, डॉ. सूर्यकांत दोशी, माजी नगरसेवक जाकीर मनेर, सुनील सस्ते, अमोल भोईटे, अमोल सस्ते यांच्यासह सर्व नवनिर्वाचित नगरसेवक, भाजपा–राष्ट्रवादीचे कार्यकर्ते तसेच नाईक निंबाळकर यांचा चाहता युवा वर्ग मोठ्या संख्येने उपस्थित होता.
फलटण नगरपालिका प्रशासनाच्या वतीने प्रशासक तथा मुख्याधिकारी निखिल जाधव यांच्यासह अधिकारी व कर्मचारी वर्गही यावेळी उपस्थित होता.
