पुणे – आर्टिफिशियल इंटेलिजन्स, रोबोटिक्स आणि STEM क्षेत्राशी निगडित प्रतिष्ठेच्या **‘रोबोटेक्स इंडिया नॅशनल चॅम्पियनशिप’**मध्ये फलटण एज्युकेशन सोसायटीच्या श्रीमंत शिवाजीराजे इंग्लिश मीडियम स्कूल (SSC), जाधववाडीच्या विद्यार्थ्यांनी अभिमानास्पद यश संपादन केले आहे.
या स्पर्धेत देवेंद्र महेश सुतार आणि शिवराज शेंडे या विद्यार्थ्यांनी ‘फोक रेस – इंटरमीडिएट’ प्रकारात राष्ट्रीय स्तरावर द्वितीय क्रमांक पटकावला असून, फलटण तालुक्याचे नाव देशभर उज्ज्वल केले आहे.
२० आणि २१ सप्टेंबर रोजी पुण्यातील एमआयटी, लोणी काळभोर येथे झालेल्या या राष्ट्रीय स्पर्धेत देशभरातील २००० पेक्षा जास्त संघ व ५००० हून अधिक विद्यार्थी सहभागी झाले होते. अशा कठीण स्पर्धेत फलटणच्या विद्यार्थ्यांनी यश मिळवणे ही मोठी अभिमानाची बाब ठरली आहे.
या विजयाबद्दल फलटण एज्युकेशन सोसायटीचे अध्यक्ष व विधानपरिषद सदस्य श्रीमंत रामराजे नाईक निंबाळकर, चेअरमन श्रीमंत रघुनाथराजे नाईक निंबाळकर, सचिव श्रीमंत संजीवराजे नाईक निंबाळकर आणि प्रशासकीय अधिकारी अरविंद निकम यांनी विजेत्या विद्यार्थ्यांचे मनःपूर्वक अभिनंदन केले. तसेच विद्यार्थ्यांना मार्गदर्शन करणाऱ्या मुख्याध्यापिका अंजुम शेख, रोबोटिक्स शिक्षक आकाश साळुंखे आणि अनिकेत माने यांच्या परिश्रमाचे विशेष कौतुक करण्यात आले.
