सातारा : कराड शहरात अल्पवयीन बालिकेवर लैंगिक अत्याचार झाल्याची धक्कादायक घटना समोर आली आहे. केवळ १८ वर्षांचा तरुण साडेचार वर्षाच्या चिमुकलीला आपल्या घरात नेऊन तिच्यावर अत्याचार केल्याची घटना २२ जुलै रोजी घडली. या प्रकारामुळे संपूर्ण गावात संतापाची लाट उसळली असून, स्थानिक नागरिकांनी आरोपीला बेदम चोप देत पोलिसांच्या ताब्यात दिले.
मिळालेल्या माहितीनुसार, पीडित मुलीची आई शेजारील घरात आखाडी जेवणासाठी मदतीसाठी गेली होती आणि तिने मुलीलाही सोबत नेले होते. मात्र आई कामात व्यस्त असताना ती खेळण्यासाठी बाहेर गेली. याच वेळी आरोपी तरुणाने तिच्यावर लक्ष ठेवून तिला आपल्या घरी नेले आणि तिच्यावर घृणास्पद अत्याचार केला.
रक्तस्त्राव झाल्यानंतर पीडितेच्या आईच्या लक्षात ही गंभीर बाब आली. तात्काळ परिसरात ही बातमी वाऱ्याच्या वेगाने पसरली आणि ग्रामस्थांनी संतप्त होत आरोपीला पकडून चांगलाच चोप दिला. पोलिसांनी तातडीने घटनास्थळी धाव घेऊन आरोपीला ताब्यात घेतले.
पोलिसांनी दाखल केलेल्या गुन्ह्यानंतर आरोपीला न्यायालयात हजर केले असता, त्याला ४ दिवसांची पोलीस कोठडी सुनावण्यात आली आहे.
अशी विकृती थांबवण्यासाठी कायदा कठोर हवा – ग्रामस्थांची मागणी
या घटनेनंतर परिसरात भीतीचे वातावरण पसरले आहे. ग्रामस्थांनी अशा प्रवृत्तींवर कठोर शिक्षा व्हावी, अशी मागणी केली असून, पोलिसांनी तातडीने कारवाई करत गावकऱ्यांचा विश्वास संपादन केला आहे.
