[ad_1]
बंगालमधील एका प्रसिद्ध महाराजाविरोधात महिलेने पोलिसांकडे गंभीर आरोप केले आहेत. भारत सेवाश्रम संघाशी संबंधित पद्मश्री पुरस्कार विजेते कार्तिक महाराज यांच्यावर एका महिलेने गंभीर आरोप केल्याने एकच खळबळ माजली आहे. महाराजांनी नोकरी देण्याच्या बहाण्याने प्रथम तिची फसवणूक केली आणि नंतर जबरदस्तीने तिच्याशी शारीरिक संबंध ठेवले, असा आरोप सदर महिलेने केला आहे. या प्रकरणी मुर्शिदाबाद जिल्ह्यातील नाबग्राम पोलीस ठाण्यात एफआयआर दाखल करण्यात आला असून पोलिसांनी तपास सुरू केला आहे.
तक्रारदार महिलेने आपली ओळख गुप्त ठेवत माध्यमांशी बोलताना सांगितलं आहे की, 2013 मध्ये कार्तिक महाराज तिला प्राथमिक शाळेत नोकरी लावण्याच्या बहाण्याने मुर्शिदाबाद इथे एका आश्रमात घेऊन गेले. महिलेला शिक्षिका म्हणून नियुक्त करण्यात आले होते आणि त्याच आश्रमाच्या परिसरात राहण्यासाठी एक खोलीही देण्यात आली होती. एका रात्री कार्तिक महाराज अचानक तिच्या खोलीत आले आणि शारीरिक संबंध ठेवण्याचा प्रस्ताव ठेवला, असा आरोप महिलेने केला आहे. तिने विरोध केला तेव्हा मानसिक दबाव आणि धमकी देऊन तिला संबंध ठेवण्यास भाग पाडले गेले, असा महिलेचा दावा आहे.
पोलिसांनी काय म्हटलं?
पोलीस सूत्रांनी दिलेल्या माहितीनुसार, भारतीय दंड संहितेच्या संबंधित कलमांखाली नबग्राम पोलीस ठाण्यात गुन्हा दाखल करण्यात आला आहे. आरोपी कार्तिक महाराज हा भारत सेवाश्रम संघाच्या बेलडांगा मठाशी संबंधित आहे. तक्रार दाखल झाल्यानंतर पोलिसांनी तपास सुरू केला आहे आणि पीडितेचा जबाब नोंदवण्यात आला आहे. वैद्यकीय तपासणीसह इतर कायदेशीर प्रक्रिया देखील पाळल्या जात आहेत.
कार्तिक महाराज काय म्हणालेत?
कार्तिक महाराज यांनी त्यांच्यावरील सर्व आरोप पूर्णपणे फेटाळून लावले आहेत. ते म्हणतात की, ते एक संन्यासी आहेत आणि संन्याशांच्या मार्गात असे अडथळे येत राहतात. ते म्हणाले की ते न्यायव्यवस्थेचा आदर करतात आणि त्यांचे वकील न्यायालयात त्यांची कायदेशीर बाजू मांडतील.
कार्तिक महाराजांच्या राजकीय संलग्नतेमुळेही हे प्रकरण अधिक गुंतागुंतीचे होते. त्यांना भारतीय जनता पक्षाचे जवळचे मानले जाते. पश्चिम बंगालच्या मुख्यमंत्री ममता बॅनर्जी यांनी त्यांच्यावर यापूर्वी अनेकदा विशेषतः निवडणुकीदरम्यान भाजपला मदत केल्याचा आरोप केला आहे. अशा परिस्थितीत, या संपूर्ण प्रकरणाकडे केवळ कायदेशीरच नव्हे तर राजकीय दृष्टिकोनातूनही पाहिले जात आहे. सध्या या प्रकरणात भारत सेवाश्रम संघाकडून कोणतीही अधिकृत प्रतिक्रिया देण्यात आलेली नाही.
[ad_2]
Source link
