Manish Mohta Success Story: उद्योग करावा आणि आयुष्यात यशस्वी व्हावं असं प्रत्येकाला वाटतं. पण प्रत्यक्षात हे सोपं नसतं. मार्केटची गरज ओळखून उद्योग काय करायचा? हे ठरवता आले पाहिजे. कोणाची मदत घ्यायची? व्यवसाय कसा चालू ठेवायचा याचे प्लानिंग पाहिजे. सुरुवातीला कोणी तुमच्यावर विश्वास ठेवणार नाहीत. व्यवसाय सुरु झाल्यावरही अनेकदा शुन्यापासून सुरुवात करावी लागू शकते. यासाठी मानसिक तयारी हवी. फार कमीजण हे सर्व टप्पे पूर्ण करतात. मनीष मोहता हे त्यापैकीच एक आहेत. मार्केटची गरज ओळखत कमी गुंतवणूक करुन त्यांनी आपल्या व्यवसायाची सुरुवात केली. आज ते यशस्वी उद्योगपती म्हणून ओळखले जातात. आजच्या घडीला लर्निंग स्पायरलची उलाढाल सुमारे 31 कोटी रुपयांची आहे. ही कंपनी भारतीय रेल्वे, ओडिशा पोलीस आणि जामिया मिलिया इस्लामिया सारख्या मोठ्या ग्राहकांना त्यांच्या सेवा पुरवते. लर्निंग स्पायरल परीक्षा सुलभ करण्यासाठी आणि मूल्यांकन प्रक्रियेत पारदर्शकता आणण्यासाठी काम करते. मनीष मोहता यांनी हे यश कसं मिळवलं? जाणून घेऊया.
रायपूरचे मनीष मोहता हे लर्निंग स्पायरल प्रायव्हेट लिमिटेडचे संस्थापक आहेत. ही एक एड-टेक कंपनी असून माहिती तंत्रज्ञान (आयटी) आणि एआय वापरून मूल्यांकन उपाय सुचवते. मनीष मोहता यांनी दिल्ली कॉलेज ऑफ इंजिनिअरिंगमध्ये त्यांच्या शेवटच्या वर्षात लर्निंग स्पायरल लाँच केले. 2000 मध्ये त्यांनी फक्त 1.85 लाख रुपयांच्या माफक गुंतवणूक करुन व्यवसाय सुरु केला. त्यावेळी 3 मत्र त्यांच्या मदतीला होते.
कशी सुचली कल्पना?
इंजिनीअरिंगच्या शेवटच्या वर्षात परीक्षा आणि प्रोजेक्ट्स एकाचवेळी मॅनेज करणं खूप कठीण असतात. बहुतांश विद्यार्थ्यांची हीच समस्या असते.
याच काळात रायपूरचे रहिवासी असलेल्या मनीष मोहता यांना एक कल्पना सुचली. त्यांनी लर्निंग स्पायरल प्रायव्हेट लिमिटेड नावाची एक एड-टेक कंपनी सुरू केली. त्यांची कंपनी परीक्षा सोप्या करण्यासाठी तंत्रज्ञानाचा वापर करते. ही कंपनी महाविद्यालये आणि विद्यार्थ्यांना परीक्षेशी संबंधित कामात मदत करते. यामध्ये सॉफ्टवेअर बनवणे, पेपर्स प्रिंट करणे आणि योग्य पद्धतीने परीक्षा घेणे यासारख्या कामांचा समावेश आहे.
क्लायंटची मोठी यादी
रायपूर, छत्तीसगड येथे असलेली लर्निंग स्पायरल ही मोहता ग्रुप ऑफ कंपनीज अंतर्गत एक उपकंपनी आहे. ती भारतीय रेल्वे, ओडिशा पोलीस, जामिया मिलिया इस्लामिया आणि पश्चिम बंगाल स्कूल बोर्ड सारख्या प्रतिष्ठित क्लायंटना सेवा पुरवते. लर्निंग स्पायरल देशभरात एंड-टू-एंड परीक्षा सेवा प्रदान करते. यामध्ये सॉफ्टवेअर सोल्यूशन्स, मॅनेज्ड सर्व्हिसेस, आउटसोर्स्ड बिझनेस प्रोसेस, सिक्युरिटी प्रिंटिंग, प्रोक्टरिंग आणि सप्लाय यासारख्या सेवांचा समावेश आहे. ही कंपनी शैक्षणिक संस्था, विद्यापीठे आणि महाविद्यालयांसोबतच रिक्रूटर्स, रिक्रूटमेंट बॉडीज आणि इतर मूल्यांकन बॉडीजना देखील सेवा देते. मूल्यांकन प्रक्रियेत पारदर्शकता आणणे हे लर्निंग स्पायरलचे उद्दिष्ट आहे.
आजच्या घडीला कोटींची उलाढाल
इंजिनीअरिंगच्या शेवटच्या वर्षात मनीष मोहता यांनी त्यांच्या मित्रांसह सुरू केलेल्या लर्निंग स्पायरलची आज 31 कोटी रुपयांची उलाढाल आहे. ही कंपनी परीक्षांशी संबंधित अनेक कामे करते. सॉफ्टवेअर बनवणे, पेपर्स प्रिंट करणे आणि परीक्षा योग्यरित्या घेणे, अशी कामे ही कंपनी करते. मी परीक्षा देत होतो तेव्हा अभ्यास करू शकत नव्हतो. सर्वजण परीक्षांमध्ये व्यस्त होते. 2 सेमिस्टर होते आणि परीक्षेचा वेळ खूप जास्त होता. जवळजवळ 2 महिने फक्त परीक्षांमध्येच जात होते. त्यामुळे अभ्यासासाठी कमी वेळ होता. त्यामुळे मला ही समस्या बदलायची होती, असे मनीष सांगतात.
सुरुवातीला कुटुंबाला शंका
मनीष मोहता यांचा जन्म एका यशस्वी व्यावसायिक कुटुंबातून झाला. कुटुंबाने त्यांच्या स्टार्टअपला पाठिंबा दिला पण त्यांना त्याच्या यशाबद्दल थोडे शंका होती. ते योग्य मार्गावर आहे की नाही याची कुटुंबाला भीती वाटत होती. सुरुवातीला मनीष यांना अनेक अडचणींना तोंड द्यावे लागले. लोकांना नवीन तंत्रज्ञान स्वीकारण्यात अडचण यायची. पण हे तंत्रज्ञान आपल्यासाठी फायदेशीर ठरतेय असे लोकांना जाणवले आणि त्यांनी ते आनंदाने स्वीकारले.
पत्नी देते साथ
बनारस हिंदू विद्यापीठ आणि जामिया मिलिया इस्लामिया हे त्यांचे पहिले ग्राहक होते. या विद्यापीठांच्या प्राध्यापकांनीही त्यांना खूप मदत केली. मनीष यांना आता त्यांची कंपनी इतर देशांमध्येही घेऊन जायचीय. पुढील काही वर्षांत त्यांना त्यांची कंपनी आणखी वाढवायचीय. त्यांना दरवर्षी 100% विकास दर मिळवायचाय. मनीष यांना 3 मुले असून ते कुटुंब आणि व्यवसाय यांच्यात संतुलन राखण्याचा प्रयत्न करतात. पत्नी रंजिता त्यांना घरी आणि ऑफिसमध्ये दोन्ही ठिकाणी साथ देत असल्याचे ते सांगतात.
