पुणे : पुण्यातील हडपसर भागात राहणाऱ्या २७ वर्षीय अनिता लोंढे या तरुणीचा गळा दाबून खून केल्याची धक्कादायक घटना समोर आली आहे. विशेष म्हणजे, खून केल्यानंतर आरोपी स्वतः यवत पोलीस ठाण्यात हजर झाला. याप्रकरणी राहुल शिवाजी मिसाळ (वय अंदाजे ३०) या युवकाला ताब्यात घेण्यात आले आहे.
पोलिसांनी दिलेल्या माहितीनुसार, हडपसरच्या भंडलकरनगर शेवळवाडी परिसरात अनिता आणि राहुल एकत्र राहत होते. घरगुती वादातून आरोपी राहुल याने अनिताचा गळा दाबून खून केल्याची प्राथमिक माहिती आहे. खून केल्यानंतर त्याने थेट यवत पोलीस ठाणे गाठत गुन्ह्याची कबुली दिली.
या प्रकरणाची माहिती मिळताच हडपसर पोलीस ठाण्याचे वरिष्ठ पोलीस निरीक्षक संजय मोगले यांनी घटनास्थळी भेट दिली असून पुढील तपास सुरू आहे. या घटनेमुळे परिसरात खळबळ उडाली आहे.
