[ad_1]
अहिल्यानगर : श्रीरामपूर पोलिसांनी केलेल्या कारवाईत १३ कोटी ७५ लाख ४१ हजार रुपये किमतीचा ४०८ किलो अल्प्राझोलम हा अमली पदार्थ जप्त करण्यात आला आहे. या संदर्भात एका टेम्पोचालकाला अटक करण्यात आली असून, पुणे जिल्ह्यातील एका रसायन अभियंत्याविरुद्ध श्रीरामपूर शहर पोलीस ठाण्यात अमली पदार्थविरोधी कायद्यान्वये गुन्हा दाखल करण्यात आला आहे.
मिनीनाथ विष्णू राशिनकर (वय ३८, धनगरवाडी, राहाता, अहिल्यानगर) या वाहनचालकाला अटक करण्यात आली आहे, तर विश्वनाथ कारभारी शिपणकर (रा. दौंड, पुणे) याच्याविरुद्धही गुन्हा दाखल करण्यात आल्याची माहिती जिल्हा पोलीस अधीक्षक राकेश ओला यांनी श्रीरामपूरमध्ये दिली. या वेळी अतिरिक्त पोलीस अधीक्षक वैभव कलबुर्मे, श्रीरामपूरचे उपविभागीय पोलीस अधिकारी डॉ. बसवराज शिवपुजे आदी उपस्थित होते. अहिल्यानगर जिल्ह्यात सुमारे १४ कोटी रुपये किमतीचे अमली पदार्थ जप्त करण्याची ही पहिलीच कारवाई आहे. अटक केलेल्या राशिनकर याला न्यायालयाने दि. २० पर्यंत कोठडी सुनावली.
श्रीरामपूर एमआयडीसी परिसरात छोट्या मालमोटारीतून अमली पदार्थांची वाहतूक होणार असल्याची माहिती उपविभागीय अधिकारी डॉ. शिवपुजे यांना मिळाली होती. त्यानुसार पोलीस निरीक्षक नितीन देशमुख यांच्यासह पथकाला शोध घेण्यास सांगितले. काल, बुधवारी सायंकाळी श्रीरामपूर दिघी-खंडाळा रस्त्यावर ही छोटी मालमोटार (एमएच २० बीटी ९५१) दिघीच्या दिशेने येताना दिसली. त्याची तपासणी केली असता १४ गोण्यांत पावडर व उर्वरित ७ गोण्यांत स्फटिक आढळले. वाहनचालक राशिनकर याने हे स्फटिक अल्प्राझोलम औषध असून, गोण्यांमधील पांढरी पावडर ही अल्प्राझोलम बनवण्याकरता लागणारा कच्चा माल असल्याचे सांगितले.
अल्प्राझोलम हा अमली पदार्थ असल्याने त्याची खात्री करण्याकरता फॉरेन्सिक तज्ज्ञांना घटनास्थळी पाचारण केले. या पथकाने केलेल्या तपासणी प्रथमदर्शनी पावडर व स्फटिक हे अल्प्राझोलम हा अमली पदार्थ व त्यासाठी लागणारा कच्चा माल असल्याचे स्पष्ट झाले. त्यानुसार ६ कोटी ९७ लाख ६७ हजार रुपये किमतीचे ६९ किलो ७६७ ग्रॅम वजनाच्या अल्प्राझोलम स्फटिकच्या ७ गोण्या तर ६ कोटी ७६ लाख ७४ हजार रुपये किमतीच्या ३३८ किलो ३७ ग्रॅम वजनाचे अल्प्राझोलम बनवण्याची पावडर १४ गोण्यांमध्ये आढळली. त्याच्यासह १ लाख रुपये किमतीचे वाहन असा एकूण १४ कोटी ७५ लाख ४१ हजार रुपये किमतीचा मुद्देमाल जप्त करण्यात आल्याची माहिती डॉ. शिवपुजे यांनी दिली. पोलिसांनी वाहनचालक मिनीनाथ राशिनकरकडे चौकशी केली असता विश्वनाथ शिपणकर याने तो दिल्याचे सांगितले.
बंदी घातलेला पदार्थ
उपविभागीय अधिकारी डॉ. शिवपुजे यांनी दिलेल्या माहितीनुसार अल्प्राझोलम हा अमली पदार्थ म्हणून गणला जातो. तो हाताळण्यास व वापरास बंदी आहे. त्याचा वापर झोपेच्या गोळ्या तयार करण्यासाठी केला जातो. हा माल कुठे उत्पादित करण्यात आला याचा तपास केला जात आहे.
यापूर्वी औषध कंपनीत काम
मिळालेल्या माहितीनुसार, रसायन अभियंता विश्वनाथ शिपणकर हा यापूर्वी एका औषध कंपनीत काम करत होता, असे समजले. अटक केलेला वाहनचालक त्याचा नातेवाईकच असल्याची माहिती मिळाली. शिपणकर दौंडमध्ये राहतो. दौंड एमआयडीसीमध्येही पोलिसांनी यापूर्वी कारवाई करत अमली पदार्थ जप्त केले होते. आता श्रीरामपूर एमआयडीसीत जप्त करण्यात आले.
[ad_2]
Source link
