माळेगाव (सातारा) :माळेगाव सहकारी साखर कारखान्याच्या चुरशीच्या निवडणुकीसाठी रविवारी (दि. २२ जून) मतदान प्रक्रिया शांततेत पार पडली. एकूण ८८.५२ टक्के मतदानाची नोंद झाली असून कारखान्याच्या इतिहासात प्रथमच एवढ्या मोठ्या प्रमाणात मतदान झालं आहे. या निवडणुकीतील मतमोजणी मंगळवारी (२४ जून) होणार असून ९० उमेदवारांचं भवितव्य मतपेटीत बंद आहे.
या निवडणुकीकडे संपूर्ण राज्याचे लक्ष लागले होते, कारण उपमुख्यमंत्री अजित पवार यांनी या निवडणुकीत स्वतः प्रचारात उतरून निळकंठेश्वर पॅनलसाठी मोर्चा उघडला होता. त्यांनी कारखान्याचा कायापालट करण्याचा निर्धार व्यक्त करत, “राज्यातील सर्वाधिक दर देण्याचं वचन” दिलं.
दुसरीकडे, विरोधकांनी अजितदादांवर टीका करत, “ते आपले खासगी साखर कारखाने मजबूत करण्यासाठी माळेगाव ताब्यात घेऊ पाहत आहेत,” असा आरोप केला. विशेष म्हणजे, शरद पवार गटानेही बळीराजा सहकार बचाव पॅनलच्या माध्यमातून निवडणुकीच्या ऐनवेळी उडी घेतली, त्यामुळे या निवडणुकीत ‘पवार विरुद्ध पवार’ असा थेट संघर्ष पाहायला मिळाला.
मतदान सकाळी ७ वाजता सुरू झालं. अ वर्गातील १९,५४९ सभासदांपैकी १७,२९६ सभासदांनी तर ब वर्गातील १०२ पैकी १०१ मतदारांनी मतदानाचा हक्क बजावला. निवडणुकीत मुख्य लढत निळकंठेश्वर पॅनल विरुद्ध सहकार बचाव शेतकरी पॅनल यांच्यात रंगली.
येत्या मंगळवारी मतमोजणीदरम्यान कोणत्या पॅनलला सभासदांचा कौल मिळतो आणि पवार गटांतून कोण बाजी मारतो याकडे सहकार क्षेत्रासह संपूर्ण राज्याचे लक्ष लागले आहे.
