फलटण |संतश्रेष्ठ ज्ञानेश्वर माऊलींच्या पालखीचे फलटण मुक्कामी आगमन आणि प्रस्थानानंतर मागे उरते ती भाविकांची श्रद्धा आणि काही प्रमाणात कचरा. याच कचऱ्याचे व्यवस्थापन आणि पालखी तळ परिसराच्या स्वच्छतेसाठी दरवर्षीप्रमाणे यंदाही स्वच्छता मोहीम राबवली जाणार आहे.
श्रीमंत संजीवराजे नाईक निंबाळकर यांच्या मार्गदर्शनाखाली १ जुलै रोजी सकाळी ८ वाजता ही स्वच्छता मोहीम सुरू होणार आहे. विमानतळ परिसरातील मुख्य पालखी तळासह कंपाऊंड लगत जमा झालेला प्लास्टिक, पेपर ग्लास आणि इतर कचरा संकलित करण्यासाठी ही विशेष मोहीम हाती घेण्यात येणार आहे.
या उपक्रमात फलटण एज्युकेशन सोसायटीचे शिक्षक, शिक्षकेतर कर्मचारी व विद्यार्थी, श्रीराम सहकारी साखर कारखाना, कृषि उत्पन्न बाजार समिती, दूध संघ, मालोजीराजे बँक, सईबाई महाराज महिला पतसंस्था, नाईक निंबाळकर देवस्थान ट्रस्ट, गोविंद मिल्क, बिल्डर्स असोसिएशन ऑफ इंडिया – फलटण शाखा, क्रेडाई फलटण शाखा तसेच शहर व तालुक्यातील अनेक संस्था, पदाधिकारी आणि फलटणकर नागरिक सहभागी होणार आहेत.
फलटण नगर परिषदेने याआधीच पालखी तळ परिसराची प्राथमिक स्वच्छता केली आहे. त्याबद्दल श्रीमंत संजीवराजे नाईक निंबाळकर यांनी नगर परिषदेला धन्यवाद दिले असून, उर्वरित भागांत स्वच्छता सुनिश्चित करण्यासाठी नागरिकांनी एकत्र येऊन या मोहिमेला पाठबळ द्यावे, असे आवाहनही त्यांनी केले आहे.
