निरगुडी : गावातील भैरवनाथ तरुण मंडळातर्फे नवरात्र उत्सवानिमित्त विद्यार्थ्यांना शैक्षणिक साहित्य वाटप करण्यात आले. या उपक्रमाचे प्रमुख मार्गदर्शक म्हणून प्रा. श्रेयस कांबळे सर यांना आमंत्रित करण्यात आले होते.
कार्यक्रमाची सुरुवात राजमाता जिजाऊ, अहिल्याबाई होळकर, सावित्रीबाई फुले आणि रमाबाई आंबेडकर यांच्या प्रतिमांचे पूजन करून करण्यात आली.
प्रास्ताविक सामाजिक कार्यकर्ते महेंद्र गोरे यांनी केले. प्रा. कांबळे सर यांनी मार्गदर्शन करताना विद्यार्थ्यांमध्ये आत्मविश्वास निर्माण करणारे विचार मांडले आणि मंडळाच्या कार्याचे कौतुक करत, “योग्य व्यक्तीकडूनच योग्य मार्गदर्शन मिळते, त्यामुळे प्रेरणादायी व्यक्तींच्या सान्निध्यात राहा,” असा मोलाचा संदेश दिला.
सामाजिक कार्यकर्ते हनुमंत केंगार व नॅशनल दलित मुव्हमेंट फॉर जस्टिसचे तालुकाध्यक्ष अमित आयवळे यांनी पुढील वर्षी हा उपक्रम अधिक व्यापक स्वरूपात राबवण्याचा संकल्प व्यक्त केला.
गावचे माजी ग्रामपंचायत सदस्य धनंजय लकडे यांनी मंडळाच्या कार्यास शुभेच्छा दिल्या.
कार्यक्रमात प्रदीप मोहिते, ढवळ गावचे उपसरपंच गणेश गोरे, ॲड. भोसले, ॲड. बनसोडे, आदी मान्यवर उपस्थित होते.
अंतिम आभार मंडळाचे अध्यक्ष सुरज गोरे यांनी मानले.
या कार्यक्रमास माजी अध्यक्ष तानाजी गोरे, निलकुमार गोरे, भिकाजी गोरे, सुनिल गोरे, अनिल गोरे, लहू गोरे, तसेच विद्यार्थी, महिला आणि ग्रामस्थ मोठ्या संख्येने उपस्थित होते.
