[ad_1]
पुणे : राष्ट्रवादी काँग्रेस पक्ष चित्रपट व सांस्कृतिक विभागाच्या वतीने घेण्यात आलेल्या ‘अजितपर्व’ या राज्यस्तरीय एकांकिका स्पर्धेत ‘पाटी’ या एकांकिकेने ५१ हजार रुपयांच्या पारितोषिकासह सांघिक विजेतेपद पटकाविले. ‘शमा’ एकांकिकेला द्वितीय, ‘सखा’ एकांकिकेला तृतीय, तर ‘एका कळीची गोष्ट‘ एकांकिकेला उत्तेजनार्थ पारितोषिक मिळाले. लोकशाहीर अण्णा भाऊ साठे स्मारक नाट्यगृहात झालेल्या स्पर्धेच्या अंतिम फेरीत २२ संघांच्या एकांकिका सादर झाल्या.
ज्येष्ठ अभिनेते मोहन जोशी, संदीप पाठक, सुनील गोडबोले, सिद्धेश्वर झाडबुके, राष्ट्रवादीच्या प्रदेश प्रवक्त्या वैशाली नागवडे, रूपाली पाटील, माजी महापौर दत्ता धनकवडे, सुभाष जगताप, आप्पा रेणुसे, बाबुराव चांदेरे, अखिल भारतीय मराठी चित्रपट महामंडळाचे अध्यक्ष मेघराज राजेभोसले, राष्ट्रवादी विद्यार्थीचे प्रदेश अध्यक्ष प्रशांत कदम, राष्ट्रवादीचे शहर कार्याध्यक्ष प्रदीप देशमुख, राष्ट्रवादी चित्रपट सांस्कृतिक विभागाचे बाबासाहेब पाटील, प्रदेश उपाध्यक्ष नितीन धवणे, प्रदेश सरचिटणीस आदित्य संजयराव यांच्या उपस्थितीत स्पर्धेतील विजेत्या संघांना पारितोषिके प्रदान करण्यात आली.
जोशी म्हणाले, ‘एकांकिकांचे प्रयोग हे फक्त स्पर्धेपुरते मर्यादित न ठेवता नवनवीन प्रयोग इतर ठिकाणी झाले पाहिजेत. दर वर्षी ही स्पर्धा घेऊन नवोदित कलाकारांना एक हक्काचे व्यासपीठ उपलब्ध करून दिले पाहिजे. ‘मराठवाड्याच्या ग्रामीण भागात अशा प्रकारच्या सुविधा नसताना महाविद्यालयीन जीवनात भरपूर एकांकिका करत करत मी ही मजल गाठली आहे,’ असा अनुभव पाठक यांनी सांगितला.
[ad_2]
Source link
