8th Pay Commission Salary Calculator: दर तिसऱ्या किंवा मग दुसऱ्या महिन्यात शासकीय कर्मचाऱ्यांच्या पगारवाढीसंदर्भातील वृत्त समोर येतं. इतक्या टक्क्यांनी पगारवाढ होणार, अमुक एक भत्ता वाढणार, कर्मचाऱ्यांच्या हातात येणारा पगार तमुक फरकानं वाढणार असा हिशोबच मांडला जातो. आता पुन्हा एकदा याच शासकीय कर्मचाऱ्यांच्या पगारासंदर्भातील किंबहुना पगारवाढीसंदर्भातील माहिती समोर आली असून, हा पगार नेमका किती फरकानं वाढेल यावर तज्ज्ञांनी विश्वेषणण केलं आहे.
केंद्र सरकारनं आठव्या वेतन आयोगासाठीच्या प्रस्तावाला मंजुरी दिल्यानं येत्या काळात 50 लाख केंद्र सरकारी कर्मचाऱ्यांना याचा फायदा मिळणार आहे. फक्त केंद्र सरकारी कर्मचारीच नव्हे, तर निवृत्तीवेतनधारकांना अर्थात पेन्शनधारकांनासुद्धा यामुळं फायदा होणार आहे. सरकारच्या एकंदर हालचाली पाहता 2026 मध्ये वेतन आयोग लागू होण्याची शक्यता आहे. याच वर्षात सातव्या वेतन आयोगाचा कार्यकाळ पूर्ण होत असल्यामुळं अशा परिस्थितीमध्ये सरकारकडे नव्या आयोगासंदर्भातील शिफारसी आणि त्यासोबतच्या सविस्तर समीक्षणासाठी पुरेसा वेळ मिळणार आहे.
किती फरकानं वाढणार कर्मचाऱ्यांचा पगार?
पगारवाढीसाठी कर्मचाऱ्यांना (Fitment Factor) फिटमेंट फॅक्टरच्या आधारे पगारवाढ मिळणार आहे. त्यानुसार जर फिटमेंट फॅक्टर कमी असेल तर, पगारवाढ फारशी होणार नाही. पण, जर तो जास्त असेल तर मात्र घसघशीत पगारवाढ होणार आहे. महागाई, कर्मचाऱ्यांच्या गरता, सरकारची आर्थिक क्षमता यांसारख्या अनेक निकषांवर हा आकडा ठरवला जातो.
मूळ वेतनात 40 ते 50 टक्क्यांची वाढ शक्य…
आठव्या वेतन आयोगाकडून नोकरदार वर्गाच्या प्रचंड अपेक्षा असून, जाणकारांच्या मते या आयोगासाठीचा फिटमेंट फॅक्टर 2.28 ते 2.86 दरम्यान असू शकतो. ज्यामुळं पगारात 40 ते 50 टक्क्यांची वाढ होईल अशी शक्यता वर्तवण्यात येत आहे. वरील फिटमेंट फॅक्टरचा थेट परिणाम कर्मचाऱ्यांच्या मूळ वेतनावर होणार असल्यामुळं पगारवाढीचा आकडा मोठा असू शकतो असं म्हटलं जात आहे.
