पुणे : महानगरपालिका निवडणुकांच्या पार्श्वभूमीवर सध्या राजकीय वर्तुळात विविध अंदाज, चर्चा आणि भाकिते रंगताना दिसत आहेत. काही ठिकाणी प्रचाराच्या सुरुवातीलाच विजयाचे दावे केले जात असले, तरी प्रत्यक्षात मतदारांचा कौल काय असेल, याबाबत अनिश्चितताच कायम आहे.
अशा वातावरणात पुणे महानगरपालिकेच्या प्रभाग क्रमांक १ मधून राष्ट्रवादी काँग्रेसचे उमेदवार शशिकांत ऊर्फ शशी अण्णा टिंगरे यांचे नाव सध्या मोठ्या प्रमाणावर चर्चेत आले आहे. प्रचारादरम्यान दिसून येणारा लोकसहभाग, नागरिकांशी असलेला थेट संवाद आणि एकूणच जनसेवक म्हणून तयार झालेली त्यांची प्रतिमा यामुळे प्रभागातील राजकीय चित्र वेगळे वळण घेत असल्याचे दिसत आहे.
शशी अण्णा टिंगरे यांच्या प्रचार यंत्रणेची बांधणी, नियोजनबद्ध प्रचार आणि नागरिकांकडून मिळणारा प्रतिसाद हे सर्व घटक लक्षवेधी ठरत आहेत. गेल्या अनेक वर्षांपासून कोणतेही पद नसतानाही सातत्याने नागरिकांच्या प्रश्नांसाठी काम केल्याची त्यांची ओळख प्रभागात पुन्हा एकदा चर्चेचा विषय बनली आहे.
प्रचारादरम्यान अनेक नागरिकांकडून “पद नसतानाही जनतेसाठी काम करणारा उमेदवार” अशी प्रतिमा शशिकांत टिंगरे यांच्याबाबत व्यक्त केली जात आहे. त्यामुळे यंदाच्या निवडणुकीत ते केवळ एक उमेदवार म्हणून नव्हे, तर प्रस्थापित राजकीय समीकरणांना आव्हान देणारा घटक ठरू शकतात, असा अंदाज काही राजकीय निरीक्षक व्यक्त करत आहेत.
प्रभाग क्रमांक १ मधील लढत चुरशीची असली, तरी सध्याचे वातावरण पाहता शशिकांत टिंगरे यांच्या उमेदवारीकडे गांभीर्याने पाहिले जात असल्याचे चित्र आहे. ते ‘जायंट किलर’ ठरतात का, आणि जनतेकडून मिळणारा प्रतिसाद प्रत्यक्ष मतांच्या रूपाने कितपत उमटतो, हे येत्या निकालाच्या दिवशी स्पष्ट होणार आहे.
लोकशाही प्रक्रियेत अंतिम निर्णय हा मतदारांचाच असतो. त्यामुळे प्रचारातील चर्चा, वातावरण आणि अपेक्षा यापेक्षा १६ जानेवारीचा निकाल काय सांगतो, याकडे सर्वांचे लक्ष लागले आहे.
