फलटण : फलटण तालुक्यातील वाजेगाव येथे शेजारी राहणाऱ्या दोन कुटुंबांमध्ये क्षुल्लक कारणांवरून तुंबळ हाणामारी झाल्याची धक्कादायक घटना समोर आली आहे. मुलीला रंग लावण्यास मज्जाव केल्याच्या रागातून तसेच “मूलबाळ होत नाही” असे म्हणून हिणवल्याच्या कारणावरून दोन्ही गटांमध्ये लोखंडी गज, कुऱ्हाड, कोयता आणि चाकूने जीवघेणे हल्ले करण्यात आले. या प्रकरणी फलटण ग्रामीण पोलीस ठाण्यात दोन्ही गटांकडून परस्परविरोधी फिर्यादी दाखल झाल्या असून एकूण आठ जणांवर गुन्हे नोंद करण्यात आले आहेत.
मिळालेल्या माहितीनुसार, पहिल्या घटनेत ३४ वर्षीय व्यक्तीने पोलिसांत फिर्याद दिली आहे. मंगळवारी (दि. ३ मार्च) दुपारी सुमारे तीन वाजण्याच्या सुमारास फिर्यादी घरी झोपले असताना शेजारी राहणारे काही जण त्यांच्या मुलीला रंग लावत असल्याचे फिर्यादीच्या मुलाने सांगितले. यानंतर फिर्यादी बाहेर येऊन “माझ्या मुलीला रंग लावू नका” असे सांगितले. या कारणावरून दोन्ही बाजूंमध्ये वाद निर्माण झाला.
वाद वाढताच संबंधित चार जणांनी फिर्यादीला शिवीगाळ करण्यास सुरुवात केली. भांडण सोडवण्यासाठी फिर्यादीची पत्नी, आई-वडील आणि मुलगा बाहेर आले असता, आरोपींनी संगनमत करून लोखंडी गज, काठी, कुऱ्हाड आणि कोयत्याने त्यांच्यावर सपासप वार केले. या हल्ल्यात फिर्यादीसह त्यांच्या कुटुंबातील पाच जण गंभीर जखमी झाले असून त्यांच्यावर उपचार सुरू आहेत.
दरम्यान, याच घटनेप्रकरणी दुसऱ्या गटातील २९ वर्षीय तरुणानेही परस्परविरोधी फिर्याद दाखल केली आहे. त्याच्या म्हणण्यानुसार, मंगळवारी सायंकाळी सुमारे पाच वाजता तो घरी आल्यानंतर शेजारील चार जण त्याच्या घरासमोर आले. त्यांनी “तुला अजून मूलबाळ नाही, तुझा या घराशी काय संबंध?” असे म्हणत त्याची हेटाळणी केली तसेच पत्नीबद्दल अपशब्द वापरत शिवीगाळ केली.
यावेळी “मला शिवीगाळ करू नका आणि माझ्या घरासमोरून निघून जा,” असे सांगितल्यावर त्या चौघांनी तरुणावर चाकू आणि लोखंडी गजाने हल्ला केल्याचा आरोप फिर्यादीने केला आहे. या हल्ल्यात तरुणाच्या मांडीत आणि उजव्या तळहातावर चाकू लागून तो जखमी झाला. तसेच भांडण सोडवण्यासाठी आलेल्या त्याच्या चुलतीलाही हाताने, लाथाबुक्क्यांनी तसेच चाकूने मारहाण करून जखमी करण्यात आल्याचे फिर्यादीत नमूद करण्यात आले आहे.
या दोन्ही परस्परविरोधी तक्रारींवरून फलटण ग्रामीण पोलीस ठाण्यात आठ जणांविरुद्ध गुन्हे दाखल करण्यात आले असून पुढील तपास पोलीस करत आहेत.
