फलटण :- फलटण ग्रामीण पोलिसांनी दालवडी परिसरात मोठी कारवाई करत स्विफ्ट कारमधून गावठी पिस्तूल, दोन जिवंत काडतुसे आणि गांजा जप्त केला. या प्रकरणात कारमालक रवींद्र कोलवडकर याला चौकशीसाठी ताब्यात घेतले असून अमली पदार्थ विरोधी कायदा आणि भारतीय शस्त्र कायद्यान्वये गुन्हा दाखल करण्याची प्रक्रिया सुरू आहे.
गुप्त माहितीच्या आधारे २८ ऑगस्ट रोजी फॉरेस्ट चेकपोस्टजवळ संशयित कारची तपासणी करण्यात आली. कारमालकाने चावी नसल्याचे सांगत उडवाउडवीची उत्तरे दिल्यानंतर पोलिसांनी गाडी उघडून पाहणी केली असता पिस्तूल, दोन काडतुसे आणि गांजा आढळून आला.
ही कारवाई पोलीस अधीक्षक तुषार दोशी, अपर पोलीस अधीक्षक वैशाली कडुकर आणि उपविभागीय पोलीस अधिकारी भालचीम यांच्या मार्गदर्शनाखाली पार पडली. तपास पथकात पोलीस निरीक्षक सुनील महाडीक, पोलीस उपनिरीक्षक गोपाळ बडणे, वैभव सूर्यवंशी, अमोल जगदाळे, नितीन चतुर्वे, हनुमंत दडस, तात्या कदम, तानाजी डोळे, तुषार नलावडे व कल्पेश काशिद यांचा समावेश होता. पुढील तपास पोलीस उपनिरीक्षक बडणे करीत आहेत.
