विडणी (ता. फलटण) : मुख्यमंत्री समृद्ध पंचायतराज अभियान 2025-26 अंतर्गत विडणी गावाने उत्साहाने सहभाग नोंदवला आहे. या अभियानाचा शुभारंभ गुरुवार, दि. 25 सप्टेंबर रोजी सकाळी आठ ते अकरा वाजता गावात “महास्वच्छता अभियान” व “महाश्रमदान” उपक्रमाने करण्यात आला.
या अंतर्गत गावातील ओढे, नाले, गटारे स्वच्छ करण्यासोबतच रस्त्यांची डागडुजी, मुरूम टाकणे, वाड्या-वस्त्या स्वच्छ ठेवणे यासारखे उपक्रम राबवले जात आहेत. गाव हरित आणि आकर्षक बनवण्यासाठी “एक व्यक्ती-एक झाड” या उपक्रमाअंतर्गत ग्रामस्थांच्या लोकसंख्येनुसार देशी झाडे लावली जाणार आहेत.
या अभियानात महिला, युवक तसेच ग्रामस्थ मोठ्या संख्येने सहभागी होत आहेत. शासनाच्या नियोजनानुसार गावाच्या प्रगतीसाठी आणि उत्कृष्ट कामगिरीसाठी हा उपक्रम राबवला जात आहे.
राज्य शासनाने 6 ऑगस्ट 2025 रोजी घेतलेल्या निर्णयानुसार पंचायत राज विभागाने हा महत्त्वाकांक्षी उपक्रम सुरू केला आहे. याचा उद्देश जिल्हा परिषद, पंचायत समिती व ग्रामपंचायतींची कार्यक्षमता वाढवून उत्कृष्ट कामगिरी करणाऱ्यांना प्रोत्साहनपर पुरस्कार देणे हा आहे.
लोकनियुक्त सरपंच सागर अभंग यांनी ग्रामस्थांना आवाहन केले की – “आपले विडणी गाव या अभियानात सहभागी झाले असून सर्वांनी एकदिलाने योगदान देऊन गाव स्वच्छ, सुंदर आणि हरित बनवावे.”
