एकाच महिन्यात तीन गंभीर गुन्ह्यांचा छडा – पोलीस उपनिरीक्षक दिपक पवार यांची कौशल्यपूर्ण कामगिरी

फलटण : फलटण तालुक्यातील निरा नदीच्या पात्रात सापडलेल्या अनोळखी मृतदेहाच्या तपासातून खुनाचा थरारक कट उघडकीस आणण्यात फलटण ग्रामीण पोलिसांना यश आले आहे. या प्रकरणाचा तपास करताना पोलीस उपनिरीक्षक दिपक ज्ञानदेव पवार यांनी अत्यंत कौशल्य आणि चिकाटी दाखवत अवघ्या एका महिन्यात तीन गंभीर गुन्ह्यांचा उलगडा केला आहे.
मृतदेहाची ओळख आणि संशयास्पद बाबी
दि. 17 फेब्रुवारी 2026 रोजी सायंकाळी सुमारे 6 वाजता गोखळी, ता. फलटण, जि. सातारा येथील निरा नदीच्या पात्रात एका अनोळखी पुरुषाचा मृतदेह पाण्यावर तरंगताना ग्रामस्थांना दिसून आला. सुरुवातीला अकस्मात मृत्यूची नोंद करण्यात आली; मात्र तपासादरम्यान मृताची ओळख अंकुश बापू नरबट (वय 22 वर्षे, रा. ढाकणी, ता. माण, जि. सातारा) अशी पटली.
मृत व्यक्ती माण तालुक्यातील असताना त्याचा मृतदेह फलटण तालुक्यात कसा आढळला? तसेच डोक्यावर आढळलेल्या जखमा संशयास्पद असल्याने पोलिसांनी सखोल तपास सुरू केला.
बनावट इन्स्टाग्राम अकाउंटद्वारे आखलेला कट
गोपनीय माहिती व तांत्रिक तपासातून धक्कादायक बाब समोर आली. मृत अंकुश नरबट याने आरोपींच्या कुटुंबातील एका मुलीबाबत गैरप्रकार केल्याची माहिती मिळाली होती. तथापि, प्रतिष्ठेच्या कारणास्तव आरोपींनी तक्रार न करता बदला घेण्याचा कट रचला.
आरोपींनी स्त्रीच्या नावाने बनावट इन्स्टाग्राम अकाउंट तयार करून मृतास प्रेमाच्या जाळ्यात अडकवले आणि फलटण येथे भेटण्यासाठी बोलावले.
दि. 15 फेब्रुवारी 2026 रोजी दुपारी मृत अंकुश नरबट फलटण येथे आल्यानंतर आरोपींपैकी एका महिलेनं त्याला तातमगिरी डोंगराच्या पायथ्याशी नेले. तेथे आधीच दबा धरून बसलेल्या इतर आरोपींनी त्याच्यावर लाथाबुक्क्यांनी मारहाण केली. त्यानंतर चारचाकी वाहनातून पिंप्रद हद्दीत नेऊन त्याचा खून करण्यात आला व पुरावा नष्ट करण्याच्या उद्देशाने मृतदेह निरा नदीत टाकण्यात आला.
गुन्हा नोंद व आरोपींना अटक
या प्रकरणी फलटण ग्रामीण पोलीस ठाण्यात गु. र. नं. 119/2026 अन्वये भारतीय न्याय संहिता 2023 चे कलम 103(1), 140(1), 238, 61, 3(5) अंतर्गत खुनाचा गुन्हा दाखल करण्यात आला आहे.
आरोपी
आविष्कार ज्ञानेश्वर भगत
श्रद्धा आविष्कार भगत
ज्ञानेश्वर भरतराव भगत
अर्चना ज्ञानेश्वर भगत
(सर्व रा. पिंप्रद, ता. फलटण, जि. सातारा)
यांना अटक करण्यात आली आहे.
तांत्रिक तपासातून उलगडा
सुरुवातीला कोणतेही ठोस धागेदोरे नसताना पोलिसांनी फलटण ते दहिवडी रोडवरील हॉटेल्स, दूध डेअरी व पेट्रोलपंप येथील सीसीटीव्ही फुटेज तपासले. आरोपी व मृताचे मोबाईल क्रमांकांची तांत्रिक माहिती विश्लेषित करून मिळालेल्या तुटपुंज्या पुराव्यांच्या आधारे घटनाक्रमाची साखळी जोडण्यात आली आणि गुन्हा उघडकीस आणण्यात आला.
वरिष्ठांचे मार्गदर्शन
ही कारवाई पोलीस अधीक्षक मा. तुषार दोशी, अपर पोलीस अधीक्षक मा. वैशाली कडुकर, उपविभागीय पोलीस अधिकारी मा. विशाल खांबे यांच्या मार्गदर्शनाखाली, पोलीस निरीक्षक संदीप जगताप यांच्या नेतृत्वाखाली पार पडली. गुन्हे प्रकटीकरण विभागाचे पोलीस उपनिरीक्षक दिपक पवार तसेच पोलीस अमलदार नितीन चतुरे, अमोल जगदाळे, श्रीनाथ कदम, वैभव सुर्यवंशी व हणमंत दडस यांनी या तपासात मोलाची भूमिका बजावली.