फलटण (ता. २३ जून) : शहरातील नरसोबानगर, कोळकी येथे एका ज्येष्ठ महिलेच्या गळ्यातील सुमारे २२ ग्रॅम वजनाचे सोन्याचे गंठण मोटारसायकलवर आलेल्या अनोळखी चोरट्यांनी भर रस्त्यात हिसकावून नेल्याची धक्कादायक घटना घडली. ही घटना शुक्रवार (दि. २१) सायंकाळी सुमारे ७ वाजण्याच्या सुमारास घडली.
सौ. शोभा सदानंद पाटणकर (वय ६६), रा. नरसोबानगर, कोळकी या अनंत मंगल कार्यालय ते आपल्या घरी जात असताना, त्यांच्या मागून आलेल्या काळ्या रंगाच्या, नंबर प्लेट नसलेल्या शाईन मोटारसायकलवरील दोघा अनोळखी इसमांनी त्यांच्या गळ्यातील सोन्याचे गंठण जबरदस्तीने हिसकावले. गाडीवरील पाठीमागे बसलेल्या युवकाने ही कृती करताच, दोघांनी वेगाने दहिवडीच्या दिशेने पलायन केले.
या घटनेनंतर फलटण शहर पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. अधिक तपास पोलीस हवालदार अमोल रणवरे करत आहेत.
🔸 सावधगिरी बाळगा:
अशा घटनांपासून सुरक्षित राहण्यासाठी नागरिकांनी शक्यतो मौल्यवान दागिने घालून एकटे प्रवास टाळावा, सार्वजनिक ठिकाणी सतर्क राहावे, तसेच संशयास्पद व्यक्ती दिसल्यास तात्काळ पोलिसांना माहिती द्यावी.
