फलटण – माजी खासदार रणजितसिंह नाईक निंबाळकर आणि आमदार सचिन पाटील यांच्या संकल्पनेतून फलटण तालुक्यातील नीरा देवघर लाभक्षेत्रातील गावांमध्ये ‘शासन आपल्या दारी’ हा उपक्रम प्रभावीपणे राबविण्यात येत असून, नागरिकांचा त्याला मोठा प्रतिसाद मिळत आहे. या उपक्रमाअंतर्गत आज विडणी येथे झालेल्या दौऱ्यात शेतकरी व नागरिकांच्या विविध प्रलंबित समस्या जागीच सोडविण्यात आल्या.
या दौऱ्यात नीरा देवघर पाणी वितरण व्यवस्था, महसूल, कृषी, महावितरण, पोलीस प्रशासन, पंचायत समितीचे विविध विभाग, पशुवैद्यकीय, आरोग्य, महिला व बालकल्याण, वन विभाग, जलसंधारण, धोम बालकवडी, नीरा उजवा कालवा, सार्वजनिक बांधकाम विभाग (जिल्हा परिषद व महाराष्ट्र शासन), सामाजिक वनीकरण, शिक्षण, जीवन प्राधिकरण, पाणीपुरवठा, भू-अभिलेख, परिवहन महामंडळ, एनएचएआय (पालखी महामार्ग), रेल्वे प्रशासन, पुनर्वसन विभाग, महाराष्ट्र औद्योगिक विकास महामंडळ आदी विभागांचे अधिकारी उपस्थित होते.
नियोजित दौऱ्यात नागरिकांच्या समस्या प्रत्यक्ष ऐकून घेण्यात आल्या व अनेक प्रश्नांचे तात्काळ निराकरण करण्यात आले. ज्या अडचणी त्वरित सोडविणे शक्य नव्हते, त्या संदर्भात संबंधित विभागांचे अधिकारी आणि नागरिकांची संयुक्त बैठक घेऊन ठोस उपाययोजना करण्याचे स्पष्ट निर्देश आमदार सचिन पाटील यांनी दिले.
आतापर्यंत तब्बल 41 गावांमध्ये हा उपक्रम राबविण्यात आला असून, प्रत्येक ठिकाणी नागरिकांचा मोठा सहभाग आणि सकारात्मक प्रतिसाद दिसून येत आहे. “असा आमदार आम्ही यापूर्वी कधी पाहिला नाही,” अशा शब्दांत नागरिकांनी आमदार सचिन पाटील यांचे आभार मानत गौरवोद्गार काढले.
