Sushant Singh Rajput Birthday: इंजिनीअर ते अभिनेता; ‘असा’ होता सुशांत सिंह राजपूत याचा फिल्मी प्रवास!

Sushant Singh Rajput Birth Anniversary: मनोरंजन विश्वात स्वतःची वेगळी ओळख निर्माण करणारा दमदार अभिनेता सुशांत सिंह राजपूत याचा जन्म २१ जानेवारी १९८६ रोजी पाटणा येथे झाला. सुशांत लहानपणापासूनच अभ्यासात प्रचंड हुशार होता. शाळेत असताना देखील सुशांत नेहमीच पुस्तकांमध्ये रमून असायचा. सुशांत इतका हुशार होता की, त्याला डीसीई प्रवेश परीक्षेत ७ वा क्रमांक मिळाला होता. यानंतर त्याने दिल्ली कॉलेज ऑफ इंजिनिअरिंगमध्ये प्रवेश घेतला. सुशांतला लहानपणापासूनच अंतराळातील गोष्टींमध्ये खूप रस होता. त्याला अंतराळवीर व्हायचं होतं. पण, त्याच्या कुटुंबाला या अभ्यासाचा खर्च परवडत नव्हता, म्हणून त्याने इंजिनीअरिंग करायला सुरुवात केली. पण, नंतर त्याने इंजिनिअरिंग सोडली आणि फिल्मी दुनियेत करिअर करण्याचा निर्णय घेतला.