Suryakumar Yadav Equals World Record Becomes 1st Indian Player with Most Consecutive 25+ Scores in T20 Cricket MI vs DC IPL 2025

सूर्यकुमार यादवने यंदाच्या मोसमात भले ही शतकी खेळी केलेली नाही. पण अर्धशतकी आणि छोट्या खेळींच्या जोरावर सूर्यादादाने आपला फॉर्म दाखवत विश्वविक्रमी कामगिरी केली आहे. सूर्यकुमार यादव वानखेडेच्या मैदानावर संथ फलंदाजी करत मैदानावर टिकून होता. त्याने सावध खेळी खेळत अखेरच्या षटकापर्यंत सामना नेला. जिथे मुंबई १८व्या षटकात १३२ धावांवर होती. तिथे नमन धीरने १९व्या षटकात २७ धावा केल्या आणि सूर्याने अखेरच्या षटकात फटकेबाजी करत १८० धावांचा टप्पा गाठला.

सूर्यकुमार यादवने यंदाच्या मोसमात त्याच्या सर्व खेळींमध्ये २५ अधिक धावा केल्या आहेत. आतापर्यंत टी-२० क्रिकेटच्या इतिहासात, टेम्बा बावुमा हा एकमेव फलंदाज आहे ज्याने सलग १३ डावांमध्ये २५ पेक्षा जास्त धावा केल्या आहेत. त्याने २०१९ ते २०२० दरम्यान हा पराक्रम केला होता, पण आता एकाच वर्षात २०२५ मध्ये सलग १३ वेळा २५ अधिक धावा करण्याचा विक्रम सूर्यकुमार यादवने करत त्याची बरोबरी केली आहे.

सूर्या एका वर्षात सर्वाधिक वेळा सलग २५ धावांचा टप्पा ओलांडणारा जगातील पहिला फलंदाज बनला आहे. सूर्यकुमार यादवने या वर्षी आयपीएलमध्ये खेळलेल्या सर्व सामन्यांमध्ये किमान २५ धावा केल्या आहेत. अशी कामगिरी करणारा तो जगातील दुसरा आणि भारतातील पहिला फलंदाज ठरला आहे. ब्रॅड हॉज, जॅक रुडॉल्फ, कुमार संगकारा, ख्रिस लिन आणि काइल मेयर्स यांनी आतापर्यंत ११ वेळा ही कामगिरी करून दाखवली आहे.