फलटण : फलटण शहरात सध्या घरगुती गॅस सिलेंडरचा तीव्र तुटवडा निर्माण झाला असून नागरिकांना मोठ्या अडचणींचा सामना करावा लागत आहे. गॅस एजन्सीसमोर सिलेंडर मिळवण्यासाठी नागरिकांना लांबच लांब रांगा लावाव्या लागत आहेत. अनेक ठिकाणी तासन्तास प्रतीक्षा करूनही सिलेंडर मिळत नसल्याने नागरिकांमध्ये संतापाचे वातावरण निर्माण झाले आहे.
शहरातील विविध भागांमध्ये गेल्या काही दिवसांपासून घरगुती गॅसचा पुरवठा सुरळीत होत नसल्याच्या तक्रारी सातत्याने समोर येत आहेत. बुकिंग करूनही वेळेत सिलेंडर मिळत नसल्याचे अनेक नागरिक सांगत आहेत. परिणामी गृहिणींसमोर स्वयंपाकाचा प्रश्न निर्माण झाला आहे.
दरम्यान, काही नागरिकांकडून गॅस पुरवठादारांकडून मुद्दाम साठेबाजी केली जात असल्याचा संशय व्यक्त केला जात आहे. कृत्रिम तुटवडा निर्माण करून काही ठिकाणी जादा दराने सिलेंडर विक्री होत असल्याची चर्चा शहरात सुरू आहे. त्यामुळे सर्वसामान्य ग्राहक अक्षरशः हैराण झाले आहेत.
या पार्श्वभूमीवर प्रशासनाने तातडीने लक्ष घालण्याची मागणी नागरिकांकडून होत आहे. शहरात गॅसचा तुटवडा नेमका कशामुळे निर्माण झाला, पुरवठा का कमी झाला आणि साठेबाजी होत आहे का, याची चौकशी करावी, अशी मागणीही पुढे येत आहे.
घरगुती गॅसचा सुरळीत पुरवठा होण्यासाठी प्रशासनाने तात्काळ हस्तक्षेप करून परिस्थिती नियंत्रणात आणावी, अन्यथा नागरिकांचा रोष अधिक तीव्र होण्याची शक्यता व्यक्त होत आहे.
