सातारा महिला हॉकी संघाचा भव्य विजय – राज्यस्तरीय स्पर्धेत तृतीय क्रमांकाची बाजी

पुणे : मेजर ध्यानचंद हॉकी स्टेडियम, पिंपरी-चिंचवड येथे आयोजित अस्मिता राज्यस्तरीय ज्युनिअर महिला हॉकी स्पर्धेत दि हॉकी सातारा महिला संघाने उत्कृष्ट कामगिरी करत तृतीय क्रमांक पटकावला. त्यांनी कोल्हापूर संघाचा २-१ असा पराभव करून सातारा जिल्ह्याच्या हॉकी संघटनेसाठी मानाचा तुरा रोवला.

स्पर्धेचा थरारक प्रवास
हॉकी महाराष्ट्र आणि स्पोर्ट्स अथॉरिटी ऑफ इंडिया (SAI) यांच्या संयुक्त विद्यमाने आयोजित या स्पर्धेत मुंबई, पुणे, कोल्हापूर, नागपूर, अहिल्यानगर, जळगाव, संभाजीनगर आणि सातारा या जिल्ह्यांच्या महिला संघांनी सहभाग घेतला होता. सातारा जिल्ह्याचा महिला संघ हा सब-ज्युनिअर वयोगटातील खेळाडूंनी बनवलेला असूनही, त्यांनी ज्युनिअर गटात जोरदार लढत दिली.

सेमीफायनलमध्ये सातारा संघाने बलाढ्य मुंबई संघाविरुद्ध उत्कृष्ट खेळ करत सामन्यात सुरुवातीला १-० अशी आघाडी घेतली. मात्र, मुंबई संघाच्या तुलनेत पॉलीग्रास मैदानाचा सराव नसल्याने सामना अखेर १-१ ने बरोबरीत सुटला आणि झिरो-एकने सातारा संघाला पराभव स्वीकारावा लागला.

उत्कृष्ट खेळाडूंचा सन्मान
सातारा संघाच्या तेजस्विनी कर्वे, सिद्धी केंजळे आणि वेदिका वाघमोडे या खेळाडूंना त्यांच्या शानदार खेळासाठी हॉकी स्टिक देऊन गौरविण्यात आले.

मान्यवरांचे कौतुक व आश्वासन
या सामन्याच्या साक्षीदार असलेल्या ऑलिंपियन धनंजय महाडिक आणि विक्रम पिल्ले यांनी सातारा महिला संघाच्या खेळाडूंचे मनःपूर्वक कौतुक केले. त्यांनी फलटणसारख्या तालुक्यातील खेळाडूंच्या उत्कृष्ट कामगिरीला दाद दिली आणि भविष्यात येथे पॉलीग्रास किंवा स्ट्रो टर्फ मैदान उपलब्ध करून देण्याची ग्वाही दिली.

स्पर्धेच्या यशामागील हातभार
स्पर्धेचे बक्षीस वितरण खेल प्राधिकरणाचे रिजनल डायरेक्टर चाटे यांच्या हस्ते करण्यात आले. या वेळी माजी हॉकी प्रशिक्षक क्लारेन्स लोबो, ओलंपियन अजित लाकरा, विक्रम पिल्ले, धनंजय महाडिक, आंतरराष्ट्रीय खेळाडू रमेश पिल्ले उपस्थित होते. स्पर्धेच्या यशस्वी आयोजनासाठी वरिष्ठ उपाध्यक्ष मनोज भोरे यांनी योग्य नियोजन केले.

मार्गदर्शन व पाठिंबा
सातारा संघाला संघटनेचे सचिव महेश खुटाळे, हॉकी प्रशिक्षक सचिन धुमाळ, बी. बी. खुरंगे यांचे मार्गदर्शन लाभले. तसेच विजयी खेळाडू व प्रशिक्षकांचे आमदार श्रीमंत रामराजे नाईक निंबाळकर, माजी आमदार दीपकराव चव्हाण, कृषी उत्पन्न बाजार समितीचे चेअरमन श्रीमंत रघुनाथराजे नाईक निंबाळकर, महाराष्ट्र खो-खो असोसिएशनचे अध्यक्ष श्रीमंत संजीवराजे नाईक निंबाळकर, मुधोजी हायस्कूलचे प्राचार्य शेडगे, दि हॉकी सातारा संघटनेचे अध्यक्ष बाहुबली शहा, तसेच सदस्य प्रवीण गाडे, महेंद्र जाधव, विजय मोहिते, पंकज पवार, सचिन लाळगे, आणि माजी राष्ट्रीय हॉकी खेळाडू सुजीत निंबाळकर यांनी अभिनंदन केले.

सातारा जिल्ह्यातील महिला हॉकी खेळाडूंनी स्पर्धेतील अप्रतिम कामगिरीने संपूर्ण महाराष्ट्राचे लक्ष वेधून घेतले आहे. भविष्यातील राष्ट्रीय व आंतरराष्ट्रीय स्तरावरही या खेळाडूंचे नाव झळकावे, हीच अपेक्षा!