फलटण : राज्यभरातील ऑटो रिक्षा आणि टॅक्सी चालकांना सामाजिक सुरक्षा कवच देण्यासाठी स्थापन करण्यात आलेल्या *‘धर्मवीर आनंद दिघे साहेब कल्याणकारी मंडळा’*ची ऑनलाइन नोंदणी प्रक्रिया फलटण उपप्रादेशिक परिवहन कार्यालयात (RTO) सुरू झाली आहे. यासंदर्भात भारतरत्न डॉ. बाबासाहेब आंबेडकर ऑटो रिक्षा संघटनेच्या सदस्यांसाठी नुकतेच विशेष मार्गदर्शन शिबिर घेण्यात आले.
प्रादेशिक परिवहन अधिकारी संदीप म्हेत्रे यांच्या मार्गदर्शनाखाली आयोजित या शिबिरात सहायक मोटार वाहन निरीक्षक प्रफुल्ल दिलीप संकुडे यांनी योजनेची सविस्तर माहिती दिली. या मंडळाद्वारे रिक्षा व टॅक्सी चालकांना सन्मान निधी (६५ वर्षांवरील चालकांसाठी), जीवन व अपंगत्व विमा, आरोग्य सुविधा, कौशल्यविकास प्रशिक्षण, कर्तव्यावर असताना अपघात झाल्यास अर्थसहाय्य, मुलांच्या शिक्षणासाठी शिष्यवृत्ती तसेच नवीन रिक्षा किंवा घर खरेदीसाठी कर्ज सुविधा असे विविध लाभ मिळणार असल्याचे त्यांनी स्पष्ट केले.
शिबिरात मोटार वाहन निरीक्षक विशाल वसंत पाटील, आरटीओ कार्यालयातील कर्मचारी, तसेच रिक्षा संघटनेचे पदाधिकारी मोठ्या संख्येने उपस्थित होते. शिबिरानंतर अनेक चालकांचे ऑनलाइन अर्ज अधिकाऱ्यांनी थेट मोबाईलवर भरून देत नोंदणी प्रक्रिया पूर्ण केली.
फलटण तालुक्यातील सर्व रिक्षा व टॅक्सी चालकांनी या योजनेत मोठ्या प्रमाणावर सहभागी होऊन शासनाच्या कल्याणकारी योजनांचा लाभ घ्यावा, असे आवाहन प्रफुल्ल संकुडे यांनी केले.
