बारामती – बीड जिल्ह्यातील मस्साजोग येथील सरपंच स्व. संतोष देशमुख यांच्या हत्येच्या निषेधार्थ मराठा क्रांती मोर्चाच्या वतीने बारामतीत सर्वधर्मीय मोर्चाचे आयोजन करण्यात आले. या वेळी स्व. संतोष देशमुख यांची कन्या वैभवी देशमुख आणि त्यांचे बंधू धनंजय देशमुख यांनी सहभाग घेतला.
माध्यमांशी संवाद साधताना वैभवी देशमुख म्हणाली, “माझ्या वडिलांची हत्या झाली, आम्हाला कोणावरही व्यक्तिगत राग नाही. मात्र, ज्यांनी हत्येच्या कटात सहभागी होऊन मदत केली, मग ते प्रशासनातील असोत किंवा इतर कोणी, त्यांना सहआरोपी करावे. ही घटना पुन्हा घडू नये, यासाठी कडक कारवाई आवश्यक आहे.”
फरार आरोपीचा तपास का रखडतोय? धनंजय देशमुखांचा पोलिसांवर सवाल!
धनंजय देशमुख यांनी फरार आरोपी कृष्णा आंधळेचा उल्लेख करत पोलिसांच्या भूमिकेवर प्रश्न उपस्थित केला.
“ही टोळी सराईत गुन्हेगारांची आहे. 307 च्या गुन्ह्यात फरार असलेला कृष्णा आंधळे दोन वर्षांपासून मोकाट फिरत आहे. तो केज आणि धारूर भागातही दिसला आहे, मात्र पोलिस त्याला अटक करत नाहीत. असे असेल, तर सर्वसामान्य नागरिकांनी कुणावर विश्वास ठेवायचा?”
धनंजय मुंडेंना सहआरोपी करावे?
संतोष देशमुख हत्या प्रकरणात वाल्मिक कराडचे नाव आल्याने माजी मंत्री धनंजय मुंडे अडचणीत सापडले होते. भाजपसह विरोधकांनी त्यांच्या राजीनाम्याची मागणी केली होती. अखेर धनंजय मुंडे यांनी तब्येतीच्या कारणास्तव मंत्रीपदाचा राजीनामा दिला, मात्र त्यांचा विधीमंडळ सदस्यपदाचा राजीनामा घ्यावा, अशी मागणी सुरू आहे.
यावर प्रतिक्रिया देताना जितेंद्र आव्हाड म्हणाले, “ही मागणी भाजपची आहे. राजकीय हेतूने हे सगळं घडत आहे.”
➡️ हत्येच्या कटात सहभागी असलेल्या प्रत्येकाला कठोर शिक्षा मिळेल का? फरार आरोपी कृष्णा आंधळेला पोलिस कधी अटक करणार? हे पाहणे महत्त्वाचे ठरेल.
