बावडा (ता. इंदापूर) – बोराटवाडी येथील लोकनेते शहाजीराव पाटील माध्यमिक व उच्च माध्यमिक विद्यालयाच्या विद्यार्थ्याने राज्यपातळीवर घवघवीत यश मिळवले आहे. विद्यालयाचा कुस्तीपटू पृथ्वीराज हनुमंत मारकड याची निवड ग्रीको-रोमन कुस्ती प्रकारातील ५१ किलो वजनी गटात राज्यस्तरीय कुस्ती स्पर्धेसाठी झाली आहे.
या उल्लेखनीय कामगिरीची माहिती विद्यालयाचे प्राचार्य भिमराव आवारे यांनी दिली. महाराष्ट्र राज्याच्या क्रीडा व युवक कल्याण संचालनालयाच्या वतीने आयोजित विभागीय कुस्ती स्पर्धा नेवासा (जि. अहिल्यानगर) येथे ऑक्टोबरच्या पहिल्या आठवड्यात पार पडल्या. या स्पर्धेत पृथ्वीराजने उत्कृष्ट कौशल्य दाखवत विभागीय स्तरावर प्रथम क्रमांक पटकावला.
पृथ्वीराजच्या या यशामागे क्रीडा शिक्षक सदाशिव सावंत व चंद्रशेखर काळे यांचे मोलाचे मार्गदर्शन लाभले. त्याच्या या घवघवीत यशाबद्दल संस्थेचे अध्यक्ष आणि माजी मंत्री हर्षवर्धन पाटील, उपाध्यक्ष मनोज पाटील, उदयसिंह पाटील, सचिव किरण पाटील, खजिनदार उमेश सूर्यवंशी, सर्व संचालक, ग्रामस्थ आणि पालकांनी त्याचे मनःपूर्वक अभिनंदन केले.
