फलटण प्रतिनिधी : राज्यातील जिल्हा परिषद व पंचायत समित्यांच्या सार्वत्रिक निवडणुका पार पडताच सत्तास्थापनेच्या हालचालींना वेग आला आहे. महाराष्ट्र शासनच्या ग्रामविकास विभागाने जारी केलेल्या अधिकृत परिपत्रकानुसार, सातारा जिल्हा परिषद तसेच अंतर्गत पंचायत समित्यांची पहिली सभा २० मार्च २०२६ पूर्वी घेणे अनिवार्य करण्यात आले आहे.
या पहिल्या सभेत जिल्हा परिषद अध्यक्ष व उपाध्यक्षांची निवड होणार असून, संबंधित पंचायत समित्यांमध्ये सभापती व उपसभापती पदांसाठीही मतदान प्रक्रिया पार पडणार आहे. त्यामुळे जिल्ह्यातील राजकीय वातावरण पुन्हा तापले असून विविध पक्षांकडून सत्तास्थापनेसाठी जोरदार मोर्चेबांधणी सुरू झाली आहे.
राज्य निवडणूक आयोगाने जाहीर केलेल्या कार्यक्रमानुसार राज्यातील १२ जिल्हा परिषद आणि त्याअंतर्गत १३५ पंचायत समित्यांच्या निवडणुका यशस्वीरीत्या पूर्ण झाल्या आहेत. नव्याने निवडून आलेल्या सदस्यांचा अधिकृत कार्यकाळ हा पहिल्या सभेपासून सुरू होणार असल्याने संबंधित जिल्हाधिकाऱ्यांना तातडीने बैठका आयोजित करण्याचे निर्देश शासनाकडून देण्यात आले आहेत.
सातारा जिल्ह्यात अध्यक्षपदासाठी नेमके कोणत्या पक्षाकडे स्पष्ट संख्याबळ आहे, यावर राजकीय समीकरणे अवलंबून आहेत. काही ठिकाणी अपक्ष सदस्यांची भूमिका निर्णायक ठरण्याची शक्यता वर्तवली जात आहे. त्यामुळे सत्तास्थापनेसाठी आघाड्या, बैठका आणि अंतर्गत चर्चांना वेग आला आहे.
दरम्यान, सातारा जिल्हाधिकाऱ्यांना शासनाकडून अधिकृत सूचना प्राप्त झाल्या असून, लवकरच जिल्हा परिषद सभेची तारीख जाहीर होण्याची शक्यता व्यक्त होत आहे. अध्यक्षपदाची माळ नेमकी कोणाच्या गळ्यात पडणार, याकडे संपूर्ण जिल्ह्याचे लक्ष लागले आहे. पुढील काही दिवसांतच सातारा जिल्हा परिषदेतील सत्तेचा सारीपाट स्पष्ट होणार आहे.
