फलटण नगरपरिषदेच्या प्रभाग क्रमांक २ ‘ब’ मध्ये तिरंगी लढतीची शक्यता — डॉ. बाबासाहेब आंबेडकरांच्या विचारांवर चालणारे युवा नेतृत्व कुणाल किशोर काकडे चर्चेत.
फलटण — फलटण नगरपरिषदेच्या प्रभाग क्रमांक २ ‘ब’ (मंगळवार पेठ) या सर्वसाधारण गटातून आगामी निवडणुकीत तिरंगी लढत होण्याची चिन्हे दिसू लागली आहेत.या प्रभागात दोन जुन्या चेहऱ्यांमध्ये संघर्ष रंगण्याची शक्यता असतानाच, डॉ. बाबासाहेब आंबेडकर यांच्या विचारांवर चालणारे, उच्च शिक्षित आणि सामाजिक कार्यात अग्रेसर युवा नेतृत्व कुणाल किशोर काकडे हे नवे पर्याय म्हणून जोरदार चर्चेत आले आहेत.
कुणाल काकडे हे गेल्या काही वर्षांपासून स्थानिक पातळीवर सामाजिक,सांस्कृतिक आणि शैक्षणिक क्षेत्रात कार्यरत आहेत. समाजात ऐक्य, प्रगती आणि विकासाचा संदेश पोहोचविण्यासाठी ते सातत्याने प्रयत्नशील आहेत. डॉ. बाबासाहेब आंबेडकर यांचे समतेचे आणि प्रबोधनाचे विचार त्यांनी आपल्या कार्यपद्धतीत रुजवले आहेत, असे त्यांच्या सहकाऱ्यांचे मत आहे.
दरम्यान, प्रभागातील जुन्या दोन गटांमध्ये आरोप-प्रत्यारोपाचे राजकारण पुन्हा एकदा तापू लागले असले तरी, नागरिक आता तिसऱ्या पर्याय म्हणून कुणाल किशोर काकडे यांच्याकडे अपेक्षेने पाहत आहेत. “बदल घडवून आणण्यासाठी नव्या नेतृत्वाला संधी मिळावी,” अशी भावना मतदारवर्गात व्यक्त होत आहे.
कुणाल काकडे यांच्या एन्ट्रीमुळे या प्रभागात तिरंगी लढत निश्चित दिसत असून, राजकीय समीकरणे नव्याने आकार घेत आहेत. फलटणमधील सामाजिक आणि राजकीय क्षेत्रात ही निवडणूक केवळ परंपरेची लढत न राहता, आंबेडकरी विचारसरणी आणि युवा नेतृत्वाच्या चळवळीची नवी दिशा ठरण्याची शक्यता आहे.
