साहस Times :- बारामती नगरपरिषदेतील राजकीय समीकरणांना नवे वळण मिळाले आहे. निवडणुकीत अपक्ष म्हणून निवडून आलेल्या तीन नगरसेवकांनी राष्ट्रवादी काँग्रेसला जाहीर पाठिंबा दिल्याने सत्ताधारी गट अधिक मजबूत झाला आहे. नीलेश इंगुले, वनिता सातकर आणि मनीषा बनकर यांनी राष्ट्रवादीच्या बाजूने जाण्याचा निर्णय घेतल्यामुळे नगरपरिषदेत विरोधकांची संख्या लक्षणीयरीत्या घटली आहे.
बारामती नगरपरिषद निवडणुकीत सत्ताधारी राष्ट्रवादीच्या विरोधात सहा उमेदवार निवडून आले होते. यामध्ये राष्ट्रवादी शरद पवार गटाच्या आरती शेंडगे, बसपच्या संघमित्रा चौधरी तसेच अपक्ष उमेदवार नीलेश इंगुले, वनिता सातकर, मनीषा बनकर आणि यशपाल पोटे यांचा समावेश होता. या सहा जणांचा स्वतंत्र विरोधी गट तयार होऊन विरोधी पक्षनेत्याची निवड होईल, अशी शक्यता वर्तवली जात होती.
मात्र आता अपक्ष म्हणून निवडून आलेल्या नीलेश इंगुले, वनिता सातकर आणि मनीषा बनकर यांनी राष्ट्रवादी काँग्रेसला पाठिंबा देत सत्ताधारी गटात सहभागी होण्याचा निर्णय घेतला आहे. त्यामुळे विरोधी गटात केवळ तीन नगरसेवक उरले असून नगरपरिषदेतील राजकीय गणिते पूर्णतः बदलली आहेत.
या घडामोडींमुळे राष्ट्रवादीची नगरपरिषदेतली ताकद आणखी वाढली असून, येणाऱ्या काळात निर्णयप्रक्रिया आणि सत्ताकारणावर याचा मोठा परिणाम होण्याची शक्यता व्यक्त केली जात आहे.
