पुणे :- पिंपरी चिंचवडमधील वाल्हेकरवाडी परिसरात रविवारी रात्री घडलेल्या एका खळबळजनक घटनेने संपूर्ण परिसर हादरला आहे. १८ वर्षीय कोमल भरत जाधव या तरुणीचा शेजारी राहणाऱ्या व्यक्तीने आपल्या भाच्याच्या मदतीने खून केल्याची धक्कादायक माहिती पुढे आली आहे. पोलिसांनी अवघ्या काही तासांत दोन्ही आरोपींना ताब्यात घेतलं.
कोमल जाधव ही वाल्हेकरवाडीत कृष्णामाई परिसरात आपल्या कुटुंबासोबत राहत होती. तिचा शेजारी उदयभान यादव (वय ४५) हा मूळचा उत्तरप्रदेशचा असून कामानिमित्त पिंपरी चिंचवडमध्ये वास्तव्यास होता. कोमल व उदयभान यांच्यात वैयक्तिक संबंध व आर्थिक व्यवहार असल्याचं तपासात निष्पन्न झालं आहे.
या वादातूनच उदयभानने कोमलचा काटा काढण्याचा निर्णय घेतला. रविवारी रात्री त्याने आपल्या भाच्याच्या मदतीने हेल्मेट घालून दुचाकीवरून येत कोमलला घराबाहेर बोलावले. ती खाली येताच धारदार शस्त्राने तिच्यावर अचानक हल्ला करून तिचा जागीच खून केला.
या घटनेनंतर पोलिसांनी तात्काळ कारवाई करत अवघ्या काही तासांत उदयभान यादव आणि त्याच्या भाच्याला अटक केली. या हत्येमागे आर्थिक व भावनिक गुंतवणूक असल्याचं तपासात समोर आलं आहे. सध्या संपूर्ण वाल्हेकरवाडी परिसरात भीतीचं व दहशतीचं वातावरण पसरलं आहे.
