फलटण :- फलटण शहर हे ऐतिहासिक वारसा लाभलेले आणि नियोजनबद्ध रचना असलेले शहर असून, त्याची स्वतंत्र ओळख राज्यभरात आहे. या ओळखीला बळकटी देत फलटणचा चौफेर विकास साधावा, बारामतीची नक्कल न करता स्वतःची ओळख निर्माण करावी, असे मत श्रीमंत संजीवराजे नाईक निंबाळकर यांनी बिल्डर असोसिएशनच्या २०२५-२६ पदग्रहण समारंभात व्यक्त केले.
या वेळी व्यासपीठावर माढा लोकसभेचे माजी खासदार रणजितसिंह नाईक निंबाळकर, आमदार सचिन पाटील, माजी नगरसेवक श्रीमंत अनिकेतराजे नाईक निंबाळकर, बिल्डर असोसिएशन इंडिया महाराष्ट्रचे चेअरमन जगन्नाथ जाधव, फलटण बिल्डर असोसिएशनचे नवनिर्वाचित अध्यक्ष महेंद्र जाधव, सेक्रेटरी मंगेश शिंदे, उपाध्यक्ष सागर शहा, खजिनदार विकास म्हेत्रे, आणि अनेक मान्यवर उपस्थित होते.
संजीवराजे म्हणाले, “फलटणच्या विकासात राजकारण येता कामा नये. जुनी झाडे वाचवून, नव्या झाडांची लागवड करून पर्यावरणाचा समतोल राखत शहराचा विकास साधला पाहिजे.”
माजी खासदार रणजितसिंह नाईक निंबाळकर म्हणाले, “रायगड उभारणाऱ्या हिरोजी इंदुलकरांनी जसा स्वतःचा ब्रँड तयार केला, तसा फलटणच्या बिल्डरांनीही तयार करावा. आपण बारामतीपेक्षा सुंदर इमारती, रस्ते तयार करून फलटण पुढे न्यावे.”
कार्यक्रमाचे प्रस्ताविक किरण दंडिले यांनी केले आणि आभार मंगेश शिंदे यांनी मानले.
