फलटण : फलटण नगरपरिषदेच्या कर विभागामार्फत मोठ्या प्रमाणात थकीत कर असणाऱ्या मालमत्ता धारकांकडून थकबाकी वसूल करण्यासाठी विशेष मोहीम राबविण्यात येत आहे. मुख्याधिकारी निखिल जाधव यांच्या सूचनेनुसार ही कारवाई सुरू करण्यात आली असून कर अधिकारी राजेश काळे व कर निरीक्षक रोहित जमदाडे यांच्या नियंत्रणाखाली तीन स्वतंत्र वसुली पथके नेमण्यात आली आहेत.
या पथकांमार्फत थकबाकीदार मालमत्ता धारक तसेच नगरपरिषदेच्या मालकीच्या गाळेधारकांवर कठोर कारवाई करण्यात येत असून, थकीत कर न भरणाऱ्यांचे गाळे सील करण्यात आले आहेत. तसेच पुढील टप्प्यात जंगम मालमत्तेची जप्ती व नळ कनेक्शन बंद करण्याची कारवाईही सुरू करण्यात आली आहे.
नगरपरिषदेने फलटण शहरातील सर्व मालमत्ता धारकांना आवाहन केले आहे की, सन २०२५-२६ या आर्थिक वर्षासह प्रलंबित मालमत्ता कर व पाणीपट्टीचा तात्काळ भरणा करून नगरपालिकेस सहकार्य करावे. अन्यथा वसुलीची मोहीम अधिक तीव्र करण्यात येईल, असा इशारा देण्यात आला आहे. याची नोंद सर्व थकीत मालमत्ता धारक व नगरपरिषदेच्या मालकीचे गाळेधारक यांनी घ्यावी, असे आवाहन प्रशासनाकडून करण्यात आले आहे.
