फलटण :- फलटण शहरात पुन्हा एकदा दुचाकीवरून येणाऱ्या चोरट्यांनी सोनसाखळी हिसकावण्याच्या घटनांना सुरुवात केली असून, एका दिवसात दोन वेगवेगळ्या भागांमध्ये महिलांच्या गळ्यातील सोन्याचे गंठण हिसकावण्याच्या घटना घडल्याने शहरात भीतीचे वातावरण निर्माण झाले आहे.
पहिली घटना गोळीबार मैदान परिसरातील आहे. सौ. रुपाली दिपक जगदाळे (वय ४५), रा. राजलक्ष्मी अपार्टमेंट, सजाई गार्डन शेजारी, या आपल्या मुलीसह गिरवी नाका ते जाधववाडी रस्त्याने जात असताना, गिरीधर क्लासेससमोरील वृंदावन बंगल्या समोर अचानक काळ्या रंगाच्या दुचाकीवरून आलेल्या दोन अनोळखी इसमांपैकी पाठीमागे बसलेल्या चोरट्याने त्यांच्या गळ्यातील सुमारे ६०,००० रुपये किमतीचे सोन्याचे मिनी गंठण हिसकावले आणि तेथून दुचाकीवरून पळ काढला. या प्रकरणाचा तपास पो.हवा. गणेश सूर्यवंशी करीत आहेत.
दुसरी घटना बारवबाग लक्ष्मीनगर येथील आहे. सौ. लिलावती सतिश लकडे (वय ३८), रा. स्वामी विवेकानंदनगर, या आपल्या बहिणीच्या बंगल्याच्या गेटजवळ उभ्या असताना, त्यांच्या मागून काळ्या दुचाकीवर आलेल्या दोघांपैकी एका चोरट्याने त्यांच्या गळ्यातील सोन्याचे मिनी गंठण हिसकावले व रिंगरोडच्या दिशेने पळून गेला. या घटनेचा तपास म.पो.हवा. पूनम बोबडे करीत आहेत.
या दोन्ही घटनांमुळे नागरिकांमध्ये भीतीचे वातावरण निर्माण झाले असून, पोलिसांनी चोरट्यांचा शोध घेण्यासाठी तपास सुरू केला आहे.
