फलटण, प्रतिनिधी : नगरपालिकेत सत्तांतर झाल्यानंतर आणि लोकनियुक्त नगराध्यक्ष समशेरसिंह नाईक निंबाळकर यांच्या नेतृत्वाखाली फलटण शहराच्या विकासाला नवे बळ मिळत असल्याचे चित्र दिसत आहे. नुकत्याच पार पडलेल्या नगरपरिषदेच्या आढावा बैठकीत शहराच्या सर्वांगीण विकासासाठी अनेक महत्त्वपूर्ण निर्णय घेण्यात आले.
माढा लोकसभा मतदारसंघाचे माजी खासदार रणजितसिंह नाईक निंबाळकर यांच्या मार्गदर्शनाखाली आणि नगराध्यक्ष समशेरसिंह नाईक निंबाळकर यांच्या अध्यक्षतेखाली ही बैठक पार पडली. यावेळी अॅड. सौ. जिजामाला रणजितसिंह नाईक निंबाळकर, उपनगराध्यक्ष प्रियदर्शिनी रणजितसिंह भोसले आणि मुख्याधिकारी निखील जाधव उपस्थित होते.
बैठकीत मुख्याधिकारी निखील जाधव यांनी विविध प्रलंबित आणि प्रस्तावित विकासकामांची सविस्तर माहिती दिली. त्यानंतर रणजितसिंह नाईक निंबाळकर यांनी प्रशासनाला स्पष्ट निर्देश देत सांगितले की, “फलटणकरांना दिलेला प्रत्येक शब्द पूर्ण करायचा आहे.” मार्च अखेरपर्यंत केंद्र, राज्य आणि नगरपालिका यांच्या माध्यमातून जवळपास १०० कोटी रुपयांच्या विकासकामांच्या वर्क ऑर्डर काढण्याचे उद्दिष्ट ठेवण्यात आले आहे.
बैठकीतील सर्वात महत्त्वाचा निर्णय म्हणजे शहरातील संकलित मालमत्ता कर पुढील पाच वर्षे वाढवला जाणार नाही. उलट नागरिकांवरील आर्थिक ताण कमी करण्यासाठी कर कमी करण्याच्या दिशेनेही प्रयत्न केले जाणार असल्याची माहिती देण्यात आली.
पर्यावरणपूरक आणि खर्च कमी करणाऱ्या उपक्रमांतर्गत नगरपालिकेचा वीजखर्च कमी करण्यासाठी सौरऊर्जा प्रकल्प राबवण्याचा निर्णय घेण्यात आला आहे. यामुळे भविष्यात नगरपालिकेचे वीजबिल जवळपास शून्यावर आणण्याचे नियोजन आहे.
शहराच्या पायाभूत सुविधांनाही मोठी चालना देण्यात येणार आहे. शहरात नवीन उद्याने, अद्ययावत रस्ते, नाट्यगृह, तारांगण आणि आधुनिक हॉस्पिटल उभारण्यास मंजुरी देण्यात आली आहे. तसेच आमदार सचिन पाटील यांच्या माध्यमातून ६ कोटी रुपये आणि राज्य नियोजन मंडळातून १० कोटी रुपये असे एकूण १६ कोटी रुपये रस्त्यांच्या कामांसाठी मंजूर करण्यात आले आहेत.
फलटण शहराच्या विकासाला गती देण्यासाठी फरांदवाडी, ठाकूरकी, जाधववाडी आणि चौधरवाडी या गावांचा शहर हद्दीत समावेश करून नगरपालिकेची हद्दवाढ करण्याचा निर्णय घेण्यात आला आहे. यानंतर फलटण नगरपालिकेला ‘अ’ वर्गाचा दर्जा मिळवून देण्याचे उद्दिष्ट आहे.
फरांदवाडी परिसरात तब्बल १७ एकर जागेवर भव्य स्टेडियम उभारण्यात येणार असून विमानतळ परिसरात हेलिपॅड, हँगिंग गार्डन आणि अॅमिनिटी पार्क विकसित करण्यात येणार आहे.
महिलांच्या सुविधांचा विचार करून शहरातील प्रमुख चौकांमध्ये सार्वजनिक स्वच्छतागृहे उभारली जाणार असून त्यापैकी ३ ते ४ स्वच्छतागृहे महिलांसाठी स्वतंत्र असतील.
अंतर्गत पालखी मार्गावरील चौकांचे सुशोभीकरण व दर्जेदार रस्त्यांचे काम करण्याचे निर्देश देण्यात आले आहेत. तसेच शहरातील पिण्याच्या पाण्याच्या पाइपलाईनसाठी अतिरिक्त ८ कोटी रुपये मंजूर करण्यात आले असून दलित वस्तीसाठी ८ ते ९ कोटी रुपयांचा निधी उपलब्ध झाला आहे.
हद्दवाढ, प्रलंबित रिंगरोड प्रकल्प आणि २४ तास पाणीपुरवठा योजना या विषयांवर २८ आणि २९ तारखेला मुख्यमंत्री देवेंद्र फडणवीस यांच्यासोबत विशेष बैठक आयोजित करण्यात येणार असल्याची माहिती रणजितसिंह नाईक निंबाळकर यांनी दिली.
बैठकीच्या शेवटी त्यांनी स्पष्ट केले की, “फलटण जिल्हा होण्याच्या दृष्टीने आपली वाटचाल सुरू आहे. भविष्यातील जिल्हा मुख्यालय ज्या दिमाखात असावे, त्या धर्तीवर फलटण शहराचा कायापालट केला जाईल.”
शहराच्या सुरक्षेसाठी नगरपालिकेत स्वतंत्र कंट्रोल रूम उभारण्यात येणार असून शहरात नाईट व्हिजन आणि नंबर प्लेट डिटेक्टर कॅमेरे बसवण्यात येणार आहेत. तसेच अतिरिक्त जिल्हाधिकारी कार्यालयामुळे फलटणमध्ये ६ नवीन तहसीलदार आणि महसूल प्रांताधिकारी कार्यरत होणार आहेत.
या आढावा बैठकीला नगरसेवक सोमाशेठ जाधव, सुदाम (अप्पा) मांढरे, अशोकराव जाधव, राहुल निंबाळकर, अमित भोईटे, संदिप चोरमले, रोहित नागटिळे, सचिन अहिवळे, किरण जाधव तसेच नगरसेविका मंगलादेवी नाईक निंबाळकर, सुपर्णा अहिवळे, रूपाली सस्ते, मिना काकडे, मोहिनी हेंद्रे आणि सिद्धाली शहा उपस्थित होत्या.
तसेच अमरसिंह नाईक निंबाळकर, रणजितसिंह भोसले, अनुप शहा, अमोल सस्ते, सनी मांढरे आणि श्रीवल्लभ हेंद्रे यांचीही उपस्थिती होती.
