फलटण (प्रतिनिधी): फलटण नगरपालिकेच्या आगामी निवडणुकीत प्रभाग क्रमांक 2 मधून सौ. वैशाली सुधीर अहिवळे यांचे नाव सर्वाधिक चर्चेत आहे. घरात दोन पिढ्यांचा राजकीय वारसा असलेली ही उमेदवार स्थानिक राजकारणात आपली ठसठशीत छाप पाडत असून, महिला मतदारांमध्येही त्यांची लोकप्रियता वाढताना दिसत आहे.
सौ. वैशाली अहिवळे यांचे सासरे तानाजीराव अहिवळे हे फलटण नगरपरिषदेचे माजी उपनगराध्यक्ष होते, तर त्यांच्या थोरल्या जाऊबाई स्वाती आशिष अहिवळे याही उपनगराध्यक्षा राहिल्या आहेत. म्हणजेच अहिवळे कुटुंबीयांचा राजकीय वारसा व लोकांमध्ये निर्माण केलेला विश्वास सौ. वैशाली अहिवळे यांना बळ देतो आहे.
दरम्यान, भाजपाचे माजी खासदार रणजितसिंह नाईक निंबाळकर यांनी कार्यक्षम आणि जनतेमध्ये विश्वासार्हतेने कार्य करणाऱ्या उमेदवारांना संधी देण्याचा निर्णय घेतल्याचे बोलले जात असून, प्रभाग 2 मधून सौ. अहिवळे यांना उमेदवारी मिळण्याची शक्यता प्रबळ मानली जाते.
त्यांचे पती सुधीर अहिवळे हे स्वतः एक ओळखले जाणारे सामाजिक कार्यकर्ते असून, फलटण शहरात विविध सामाजिक उपक्रम, गरजूंसाठी मदत, तसेच महिलांच्या प्रश्नांवर त्यांनी सातत्याने काम केले आहे. त्यांच्या सामाजिक कार्याचा फायदा सौ. अहिवळे यांना स्थानिक स्तरावर लोकसंपर्क वाढवण्यासाठी होत आहे.
रस्ते, पाणी, आरोग्य, महिला सक्षमीकरण या मुद्द्यांवर सौ. अहिवळे यांनी नेहमी पुढाकार घेतला आहे. त्यामुळे प्रभाग क्रमांक 2 मध्ये त्या एक मजबूत आणि प्रभावी महिला उमेदवार म्हणून पुढे येत आहेत.
त्यांचे थोरले दिर आशिष अहिवळे यांचे कार्यही प्रेरणादायी ठरले आहे. युवक संघटनांच्या माध्यमातून त्यांनी समाजात उल्लेखनीय कार्य केले असून, आजही त्यांच्या कार्याची छाप सहकाऱ्यांमध्ये आणि कुटुंबाच्या पाठीशी असणाऱ्यांमध्ये दिसून येते.
एकूणच, प्रभाग 2 मधील निवडणूक चुरशीची होणार असली तरी, फलटणकरांचे लक्ष आता सौ. वैशाली सुधीर अहिवळे या महिलेकडे लागले आहे, हे नक्की.
