सुनेत्रा पवारांच्या अचानक पाहणीनंतर बारामती वैद्यकीय महाविद्यालयात मोठी प्रशासकीय उलथापालथ; डीनसह प्रशासकीय अधिकाऱ्यांची बदली
बारामती | प्रतिनिधी :- उपमुख्यमंत्री अजित पवार यांच्या पत्नी तथा राज्याच्या उपमुख्यमंत्री सुनेत्रा पवार यांनी काही दिवसांपूर्वी अहिल्यादेवी होळकर शासकीय वैद्यकीय महाविद्यालय व रुग्णालयाला दिलेल्या अचानक भेटीनंतर आरोग्य प्रशासनात मोठ्या हालचालींना वेग आला आहे. या पार्श्वभूमीवर महाविद्यालयाचे अधिष्ठाता (डीन) डॉ. महस्के तसेच प्रशासकीय अधिकारी नंदकुमार कोकरे यांची बदली करण्यात आल्याने बारामतीच्या प्रशासकीय वर्तुळात विविध चर्चांना उधाण आले आहे.
सुनेत्रा पवार यांनी रुग्णालयाच्या पाहणीदरम्यान रुग्णसेवा, स्वच्छता, औषध उपलब्धता, विविध विभागांचे कामकाज तसेच नागरिकांना दिल्या जाणाऱ्या सुविधांचा सविस्तर आढावा घेतला होता. पाहणीवेळी काही त्रुटी त्यांच्या निदर्शनास आल्याची चर्चा रंगली होती. यावेळी संबंधित अधिकाऱ्यांना आवश्यक सूचना देत आरोग्यसेवा अधिक सक्षम, पारदर्शक आणि नागरिकाभिमुख करण्यावर त्यांनी भर दिला होता.
विशेष म्हणजे, या पाहणीनंतर अवघ्या काही दिवसांतच डीन आणि प्रशासकीय अधिकाऱ्यांच्या बदल्यांचे आदेश जारी झाल्याने या निर्णयाकडे विशेष महत्त्वाने पाहिले जात आहे. प्रशासनातील कार्यक्षमता, जबाबदारी आणि उत्तरदायित्वाबाबत कोणतीही तडजोड केली जाणार नसल्याचा संदेश या निर्णयातून गेल्याची चर्चा शहरात सुरू आहे.
दरम्यान, महाविद्यालयाच्या नवीन अधिष्ठाता म्हणून डॉ. किरणकुमार जाधव यांची नियुक्ती करण्यात आली असून त्यांच्या नेतृत्वाखाली वैद्यकीय महाविद्यालय व संलग्न रुग्णालयातील कामकाज अधिक गतिमान आणि परिणामकारक होईल, अशी अपेक्षा व्यक्त केली जात आहे.
बारामतीतील नागरिक, सामाजिक संस्था आणि रुग्णांच्या नातेवाईकांनी या बदलांचे स्वागत केले असून आरोग्य व्यवस्थेत अधिक उत्तरदायी, पारदर्शक आणि परिणामकारक प्रशासन उभे राहील, अशी अपेक्षा व्यक्त केली आहे.
‘पाहणी आणि तातडीचा निर्णय’ ठरला चर्चेचा विषय
विकासकामांसोबतच शिक्षण आणि आरोग्य क्षेत्रातील गुणवत्तेबाबत सुनेत्रा पवार स्वतः लक्ष घालत असल्याचे या घडामोडींमधून अधोरेखित झाले आहे. केवळ पाहणीपुरते मर्यादित न राहता आवश्यक ठिकाणी त्वरित निर्णय घेण्याची त्यांची कार्यपद्धती पुन्हा एकदा चर्चेचा विषय ठरली आहे.
आरोग्यसेवा अधिक दर्जेदार, पारदर्शक आणि नागरिककेंद्रित करण्यासाठी आवश्यक ते बदल करण्यास प्रशासन मागेपुढे पाहणार नाही, असा संदेश या प्रशासकीय फेरबदलातून गेल्याची चर्चा सध्या बारामतीत रंगत आहे.
