दरम्यान, आगामी लोकसभा निवडणुकीसाठी समाजवादी पक्ष आणि राष्ट्रीय लोकदलादरम्यान आघाडी झाली असून उत्तर प्रदेशात जागावाटपाचा फॉर्म्युला निश्चित करण्यासाठी काँग्रेससोबत अधिक चर्चा करणार असल्याचे सपाचे नेते, माजी मुख्यमंत्री अखिलेश यादव यांनी सांगितले. यादव यांनी लखनौमध्ये पक्षाच्या नेत्यांसोबत नुकतीच बैठक घेतली. जागावाटप करताना विजय हा महत्त्वाचा निकष असल्याचे त्यांनी अधोरेखित केले. नव्या मतदार यादीत सपा समर्थकांची नावनोंदणी करण्याचे यादव यांनी यावेळी आवाहन केले. उत्तर प्रदेशात भाजप सरकारने काही सपा कार्यकर्त्यांची नावे मतदार यादीतून वगळल्याचा आरोप यादव यांनी केला. एप्रिल-मे महिन्यात होणाऱ्या लोकसभा निवडणुकीसाठी काँग्रेस आणि समाजवादी पक्षात जागावाटपाची चर्चा झाली आहे.
