फलटण : यंदाच्या गणेशोत्सव विसर्जनासाठी फलटण नगरपालिकेने आखलेल्या काटेकोर नियोजनामुळे विसर्जन प्रक्रिया सुरळीत आणि शांततेत पार पडली. घरगुती गणेश विसर्जन करणाऱ्या नागरिकांपासून ते गणेशोत्सव मंडळांच्या कार्यकर्त्यांपर्यंत सर्वांना कोणतीही अडचण आली नाही.
क्रांतिसिंह नाना पाटील चौक येथील निरा उजवा कालवा पंढरपूर पुलावर मोठ्या गणेश मंडळांसाठी विशेष सुविधा उपलब्ध करून देण्यात आल्या होत्या. यंदा प्रथमच पुलावर बॅरिकेट्स लावण्यात आल्याने वाहतूक सुरळीत राहिली. मोठ्या गणपतींचे विसर्जन क्रेनच्या साह्याने करण्यात आले.
घरगुती गणपतींसाठी यशवंतराव चव्हाण हायस्कूल आणि इंदिरा गांधी सांस्कृतिक भवन येथे जलकुंडांची व्यवस्था करण्यात आली होती. जलप्रदूषण रोखण्यासाठी प्रत्येक विसर्जनानंतर मूर्ती जलकुंडातून वेगळ्या करण्यात आल्या. यावेळी नगरपालिका कर्मचारी दिवसभर उपस्थित राहून विसर्जन प्रक्रिया सुरळीत पार पाडत होते.
निरा उजवा कालवा परिसरातही नगरपालिकेची मोठी टीम तैनात होती. निर्माल्य कलेशची व्यवस्था करून नागरिकांना पूजाविधीतील साहित्य पाण्यात न टाकण्याचे आवाहन करण्यात आले, ज्याला उत्स्फूर्त प्रतिसाद मिळाला. आपत्ती व्यवस्थापन अधिकारी श्री. विनोद जाधव आणि फलटण नगरपालिकेचे मुख्याधिकारी व प्रशासक श्री. निखिल मोरे यांच्या मार्गदर्शनाखाली संपूर्ण कर्मचारी वर्गाने जबाबदारीने कर्तव्य बजावले.
