फलटण प्रतिनिधी :- फलटण तालुक्यातील विविध पर्यटनस्थळांच्या विकासासाठी प्रादेशिक पर्यटन योजनेअंतर्गत तब्बल दोन कोटी रुपयांचा निधी मंजूर झाला आहे. या निधीमुळे तालुक्यातील महत्त्वाच्या धार्मिक व नैसर्गिक स्थळांना आवश्यक मूलभूत सुविधा उपलब्ध होणार आहेत.
खासदार मा. रणजितसिंह नाईक-निंबाळकर आणि आमदार सचिन पाटील यांनी राज्य शासनाकडे सातत्याने पाठपुरावा करून हा निधी मंजूर करून घेतला. आमदार पाटील यांनी सांगितले की, “तालुक्यातील सर्व धार्मिक स्थळांचा सर्वांगीण विकास करण्याचा आमचा संकल्प आहे आणि मंजूर झालेल्या कामांना लवकरच सुरुवात होईल.”
मंजूर कामांमध्ये गोखळी येथे निरा नदीवरील घाट बांधकाम व विकासासाठी ४० लाख रुपये, सोमथळी येथे हनुमान मंदिर परिसरात शेड बांधकाम व विकासासाठी ३० लाख रुपये, नाईकबोमवाडी येथे तातमगिरी देवस्थान व्यास ऋषी समाधी स्थळापर्यंत पायऱ्या बांधकामासाठी २५ लाख रुपये, फलटण येथे श्रीकृष्ण डोह विकासासाठी ४० लाख रुपये, कोरेगाव भावेनगर येथे घुमाई देवी मंदिर ओढ्यावर झुलता पूल बांधण्यासाठी २० लाख रुपये, कोरेगाव चौवनेश्वर येथे चौणेश्वर मंदिर परिसरात भक्तनिवास बांधकामासाठी १० लाख रुपये, कोरेगाव सोळशी येथे शनि देवस्थान मंदिराकडे जाणाऱ्या रस्त्याच्या सुधारनेसाठी १५ लाख रुपये आणि कोरेगाव विकले येथे जोगमट परिसरात संरक्षण भिंत बांधण्यासाठी २० लाख रुपये मंजूर झाले आहेत.
एकूण दोन कोटी रुपयांचा हा निधी मंजूर झाल्याने फलटण-कोरेगाव मतदारसंघातील धार्मिक आणि पर्यटन स्थळांचा विकास होऊन पर्यटनाला चालना मिळणार आहे.
