फलटण प्रतिनिधी : माजी आमदार स्व. हरिभाऊ निंबाळकर यांनी राजकीय, सामाजिक आणि पत्रकारितेच्या क्षेत्रात दिलेला मूल्याधिष्ठित वारसा आजच्या तरुण पत्रकारांनी समर्थपणे जोपासला आहे, असे गौरवोद्गार माजी सभापती श्रीमंत रामराजे नाईक निंबाळकर यांनी काढले. तरुण पत्रकारांच्या पुढाकारातून आयोजित करण्यात आलेल्या क्रिकेट स्पर्धेच्या प्रसंगी ते बोलत होते.
पत्रकारांनी केवळ बातम्या मांडण्या .पुरतेच मर्यादित न राहता समाजातील विविध घटकांना एकत्र आणणारे उपक्रम राबवावेत, असा संदेश या स्पर्धेतून मिळतो. क्रिकेटसारख्या लोकप्रिय खेळाच्या माध्यमातून राजकीय, सामाजिक क्षेत्रातील मान्यवर तसेच शासकीय अधिकारी एकत्र येत असल्याने परस्पर सलोखा, संवाद आणि मैत्री वाढीस लागते, असेही त्यांनी नमूद केले.
या क्रिकेट स्पर्धेत स्थानिक पत्रकार संघटनांनी पुढाकार घेत उत्कृष्ट नियोजन केले असून, खेळाडूंसाठी उत्तम सुविधा, शिस्तबद्ध आयोजन आणि क्रीडा स्पर्धेचा खरा आनंद जपण्यात आला आहे. राजकीय नेते, सामाजिक कार्यकर्ते, प्रशासकीय अधिकारी आणि पत्रकारांनी मैदानावर खेळाचा आनंद घेत आपले दैनंदिन तणाव विसरून सहभाग नोंदवला.
यावेळी मान्यवरांनी पत्रकारांच्या या उपक्रमाचे कौतुक करत स्पर्धेसाठी सदिच्छा भेट दिली. समाजाला सकारात्मक दिशा देणाऱ्या अशा उपक्रमांतून पत्रकारितेची सामाजिक जबाबदारी अधिक ठळकपणे समोर येते, असे मत उपस्थितांनी व्यक्त केले. स्पर्धेमुळे तरुणांमध्ये खेळाची आवड वाढेल तसेच पत्रकार व प्रशासन यांच्यातील नाते अधिक दृढ होईल, असा विश्वासही व्यक्त करण्यात आला.
कार्यक्रमाच्या आयोजक पत्रकारांनी उपस्थित सर्व मान्यवरांचे, खेळाडूंचे आणि प्रेक्षकांचे आभार मानले. या स्पर्धेच्या यशस्वी आयोजनामुळे भविष्यातही अशा क्रीडामूल्य जपणाऱ्या उपक्रमांचे आयोजन करण्याचा संकल्प करण्यात आला.
