फलटण, प्रतिनिधी – महिला डॉक्टर आणि पोलिसांमध्ये झालेल्या परस्परविरोधी तक्रारींची चौकशी ऑगस्ट २०२५ मध्येच पूर्ण करण्यात आली होती. पोलिसांच्या तपासानुसार जानेवारी ते मार्च या काळात डॉक्टर महिलेचा संपर्क गोपाळ बदने यांच्याशी होता, तर मार्चनंतर प्रशांत बनकर यांचे कॉल तिच्या मोबाईलवर आढळले.
दीपावलीच्या लक्ष्मीपूजनाच्या दिवशी फोटो काढण्यावरून डॉक्टर महिला आणि प्रशांत बनकर यांच्यात वाद झाल्याचे समोर आले आहे. या वादानंतर ती डॉक्टर एका मंदिरात जाऊन बसली होती. त्यावेळी प्रशांत बनकर यांचे वडील तिला घरी घेऊन गेले, परंतु ती तेथून निघून थेट हॉटेलमध्ये गेली आणि तिथेच तिने आत्महत्या केली, अशी माहिती समोर आली आहे.
या प्रकरणाच्या तपासाची पारदर्शकता राखण्यासाठी पोलीस विभाग, फॉरेन्सिक लॅब तसेच राज्य महिला आयोग सक्रियपणे लक्ष ठेवून असल्याचे राज्य महिला आयोगाच्या अध्यक्षा रूपाली चाकणकर यांनी स्पष्ट केले.
त्या फलटण उपजिल्हा रुग्णालयात भेट देऊन संपूर्ण घटनेची माहिती घेतल्यानंतर झालेल्या पत्रकार परिषदेत बोलत होत्या. यावेळी आमदार सचिन पाटील, पोलीस अधीक्षक तुषार दोशी, जिल्हा शल्य चिकित्सक डॉ. युवराज करपे, उपविभागीय पोलीस अधीक्षक विशाल खांबे तसेच महिला व बाल विकास अधिकारी शिल्पा पाटील उपस्थित होते.
फॉरेन्सिक लॅब आणि लोकेशन डिटेक्शनच्या माध्यमातून आत्महत्या प्रकरणाची सखोल पडताळणी केली जात असून, तपासामध्ये कोणतीही कमतरता राहणार नाही, असे आश्वासन रूपाली चाकणकर यांनी दिले.
तसेच शासकीय आणि अशासकीय संस्थांमधील अंतर्गत तक्रार निवारण समित्या प्रभावीपणे काम करतात की नाही, यासाठी वर्षातून किमान दोनदा या समित्यांचे ऑडिट करण्यात यावे, अशा सूचना त्यांनी संबंधित विभागांना दिल्या.
