फलटण, ता. २४ मार्च – फलटण-बारामती मार्गावरील सोमंथळी (ता. फलटण) येथील सरकारी मळाजवळ भरधाव कारने दुचाकीला जोरदार धडक दिल्याने सस्तेवाडी (ता. फलटण) येथील सद्दाम फरास (वय २५) या तरुणाचा जागीच मृत्यू झाला, तर त्याच्यासोबत असलेला युवराज चव्हाण गंभीर जखमी झाला आहे.
ही दुर्घटना सोमवारी (२४ मार्च) सकाळी घडली. सद्दाम फरास आणि युवराज चव्हाण कामानिमित्त बारामतीकडे निघाले होते. महामार्गावरून जाणाऱ्या त्यांची दुचाकी (क्र. MH-11 CR 0064) ला बारामतीहून फलटणकडे येणाऱ्या इंडिका विस्टा (क्र. MH-42 AF 9600) कारने जोरदार धडक दिली. धडक इतकी भीषण होती की, सद्दाम फरास याचा जागीच मृत्यू झाला, तर युवराज चव्हाण गंभीर जखमी झाला.
अपघाताची माहिती मिळताच स्थानिक नागरिकांसह फलटण ग्रामीण पोलीस ठाण्याचे अजित पिंगळे आणि प्रदीप खरात घटनास्थळी पोहोचले. १०८ रुग्णवाहिकेद्वारे जखमीला तातडीने फलटणच्या आरोग्य केंद्रात दाखल करण्यात आले.
अपघातानंतर कार चालकाने पळून जाण्याचा प्रयत्न केला, मात्र सतर्क ग्रामस्थांनी त्याला पकडले. या अपघातामुळे सोमंथळी परिसरात हळहळ व्यक्त केली जात असून, बारामती-फलटण महामार्गावरील वारंवार होणाऱ्या अपघातांबद्दल नागरिकांमध्ये संताप व्यक्त केला जात आहे. महामार्गावरील सुरक्षेबाबत ठोस उपाययोजना करण्याची मागणी स्थानिकांकडून होत आहे.
याप्रकरणी फलटण ग्रामीण पोलिसांनी पुढील तपास सुरू केला आहे.
