फलटण : फलटण तालुक्यातील निंबळक गावाच्या हद्दीत पालखी महामार्गावर चारचाकी आणि दुचाकीच्या किरकोळ धडकेवरून वाद वाढत गेला आणि त्यातून धक्कादायक घटना घडली. सोमवारी (दि. १७) माजी सैनिकाने थेट पिस्टल बाहेर काढून दहशत पसरवण्याचा प्रयत्न केल्याने परिसरात एकच खळबळ उडाली.
याप्रकरणी फलटण ग्रामीण पोलिसांनी तात्काळ कारवाई करत आरोपीकडून एक पिस्टल, एक जिवंत काडतूस आणि चारचाकी असे ११ लाख रुपये किमतीचे साहित्य जप्त केले आहे.
घटनेचा तपशील:
माजी सैनिक दत्तात्रय बाबू महारनूर (वय ४९, रा. ऋषिकेशवाडी, ता. सांगोला, जि. सोलापूर) हे आपल्या चारचाकी (क्रमांक MH 12 US 9535) मधून पंढरपूर ते पुणे असा प्रवास करत होते. निंबळक गावच्या हद्दीत त्यांच्या गाडीला दुचाकीचा सौम्य धक्का बसल्याने दुचाकीस्वार विक्रम आडके यांच्यासोबत वाद सुरू झाला. हा वाद चिघळत गेला आणि संतापाच्या भरात महारनूर यांनी आपली पिस्टल बाहेर काढली.
स्थानिक नागरिकांनी तातडीने पोलिसांना कळवले. फलटण ग्रामीण पोलीस घटनास्थळी दाखल होताच प्रसंगावधान राखून कोणतीही जीवितहानी होऊ न देता माजी सैनिकाला ताब्यात घेतले.
पोलिसांची तत्परता:
या प्रकरणी पोलिसांनी पिस्टल, जिवंत काडतूस आणि चारचाकी असा एकूण ११ लाख रुपये किमतीचा मुद्देमाल जप्त केला. पुढील तपास सुरू असून पोलिसांकडून या प्रकरणातील कायदेशीर बाबींची पडताळणी केली जात आहे.
— साहस Times
