मुंबई प्रतिनिधी :- राजकारणात मोठा भूकंप घडवत फलटणचे माजी नगराध्यक्ष व श्री सद्गुरु-महाराजा संस्था समूहाचे प्रमुख दिलीपसिंह भोसले यांनी अखेर भारतीय जनता पक्षात जाहीर प्रवेश केला आहे. महाराष्ट्र भाजपा प्रदेशाध्यक्ष ना. चंद्रशेखर बावनकुळे यांच्या उपस्थितीत मुंबईतील भाजपा प्रदेश कार्यालयात हा पक्षप्रवेशाचा कार्यक्रम पार पडला. यावेळी माढा लोकसभा मतदारसंघाचे माजी खासदार रणजितसिंह नाईक निंबाळकर हेही उपस्थित होते.
या पक्षप्रवेशानंतर भोसले यांनी आ. श्रीमंत रामराजे नाईक निंबाळकर यांच्या राजे गटाला स्पष्टपणे रामराम ठोकला आहे. भोसले यांच्यासोबत श्री सद्गुरु हरिबुवा महाराज नागरी सहकारी पतसंस्थेचे चेअरमन तेजसिंह भोसले आणि समूहातील इतर पदाधिकाऱ्यांनीही भाजपमध्ये प्रवेश करत भाजपा संघटनास नवसंजीवनी दिली.
चार दशकांहून अधिक काळाचे सामाजिक योगदान
1974 पासून फलटणच्या सामाजिक व राजकीय जीवनात सक्रीय असलेले दिलीपसिंह भोसले हे शहराच्या विकासासाठी एक झपाटलेले नेतृत्व म्हणून ओळखले जातात. 1978 च्या फलटण नगरपालिका निवडणुकीत त्यांनी नागरी संघटनेच्या माध्यमातून प्रस्थापितांना धक्का देत यश मिळवले. नंतर नगरसेवक, नगराध्यक्ष या पदांवर त्यांनी प्रभावी कामगिरी बजावली.
त्यांच्या कार्यकाळात उभारले गेलेले प्रियदर्शनी इंदिरा गांधी सांस्कृतिक भवन आजही फलटण शहराच्या सांस्कृतिक ओळखीचे प्रतीक आहे. या सभागृहात लता मंगेशकर यांच्यासारख्या दिग्गजांचा कार्यक्रम झाला आहे.
सहकार, शिक्षण, व साहित्य-संस्कृतीचे द्रष्टे नेतृत्व
राजकीय कारकिर्दीबरोबरच दिलीपसिंह भोसले यांनी सहकार क्षेत्रात उल्लेखनीय कामगिरी केली आहे. त्यांच्या नेतृत्वाखाली चालणाऱ्या संस्था म्हणजे –
- श्री सद्गुरु हरिबुवा महाराज पतसंस्था
- महाराजा मल्टीस्टेट को-ऑप. क्रेडीट सोसायटी
- सहकार महर्षी हणमंतराव पवार कुक्कुटपालन संस्था
या संस्थांच्या पारदर्शक आणि शिस्तबद्ध कारभारामुळे संपूर्ण सातारा जिल्ह्यात त्यांची विश्वासार्ह छाप आहे. शिक्षण, साहित्य व संस्कृतीच्या माध्यमातून त्यांनी समाजमनाला जोडले आहे. श्री सद्गुरु प्रतिष्ठान आणि श्री सद्गुरु शिक्षण संस्थेच्या माध्यमातून त्यांनी शिक्षण प्रसारात मोलाचे योगदान दिले आहे.
भाजपला मिळाले तगडे नेतृत्व
फलटणसह संपूर्ण तालुक्यात भाजपला दिलीपसिंह भोसले यांच्या प्रवेशामुळे नवे बळ मिळाले आहे. राजकारणासोबत समाजकारणातही त्यांचे अनुभव आणि नेतृत्व भाजपच्या वाढीस उपयुक्त ठरणार आहे, अशी प्रतिक्रिया कार्यकर्त्यांमधून उमटत आहे.
या कार्यक्रमाला अॅड. सौ. मधुबाला भोसले, रणजितसिंह भोसले, संदीप जगताप, जयकुमार शिंदे, अमोल सस्ते, संदीप चोरमले आदी पदाधिकारी उपस्थित होते.
