बारामती :आगामी लोकसभासाठी सर्व राजकीय पक्षांची तयारी सुरु झाली आहे. कोणत्या जागेवर कोणता उमदेवार असणार आता याची देखील चर्चा जोरात सुरु आहे.
यातच आता राज्याचे उपमुख्यमंत्री अजित पवार यांनी आगामी लोकसभा निवडणुकीची तयारी सुरू केली आहे. त्यांनी बारामती लोकसभा मतदारसंघात उमदेवार देण्याची घोषणा केली आहे.
बारामतीत भावनिक मुद्दय़ांवर आणि नंतर आपल्या भागातील विकासाच्या मुद्द्यांवर मतदान करायचे की नाही हे आता या लोकांनी ठरवावे, असे ते म्हणाले. गेल्या अनेक वर्षांपासून बारामती लोकसभा मतदारसंघ हा शरद पवार आणि सुप्रिया सुळे यांचा पारंपारिक बालेकिल्ला आहे.
बारामतीच्या जागेबाबत राष्ट्रवादी काँग्रेसचे सर्वेसर्वा आणि राज्याचे उपमुख्यमंत्री अजित पवार यांनी जनतेला आवाहन करून सांगितले की, महाराष्ट्र राज्याच्या स्थापनेपासून आणि निवडणुकीच्या प्रारंभापासून आजपर्यंत विरोधी उमेदवाराचे डिपॉझिट जमा झाले नाही असे बारामतीत कधीच घडले नाही आणि मला त्याचा अभिमान आहे.
बारामती हा शरद पवारांचा बालेकिल्ला मानला जातो आणि राष्ट्रवादी काँग्रेसने इथून नेहमीच मोठ्या मताधिक्याने निवडणुका जिंकल्या आहेत. बारामतीबाबत अजित पवार पुढे म्हणाले की, ‘आगामी लोकसभा निवडणुकीत येथून कोणताही उमेदवार उभा केला तरी तुम्ही त्याला विजयी करा… तरच मी विधानसभा निवडणुकीत येथून लढणार आहे.
तुमचा माझ्याबद्दलचा उत्साह ईव्हीएममध्ये दिसून आला पाहिजे. येणाऱ्या काळात लोक तुमच्याकडे येतील आणि भावनिक मुद्द्द्यांवर तुमची मते मागतील. पण भावनिक मुद्द्यांवर मतदान करायचे की विकासाचे काम चालू ठेवायचे आणि तुमच्या भावी पिढीच्या कल्याणासाठी मतदान करायचे हे तुम्हीच ठरवायचे आहे.
अजित पवार यांनी पुन्हा एकदा शरद पवार यांच्यावर निशाणा साधत म्हणाले कि, जर मी एखाद्या ‘ज्येष्ठ नेत्या’ चा मुलगा असतो तर आतापर्यंत राष्ट्रवादी काँग्रेसचा अध्यक्ष सहज झाला असतो.
अजित पवार यांच्या या टीकेला जितेंद्र आव्हाड यांनी उत्तर देत नाराजी व्यक्त केली आहे. ते म्हणाले तुम्ही शरद पवार यांचे पुतणे नसते महाराष्ट्राच्या राजकारणात इतक्या वेगाने उदयाला आले नसते.
पुढे अजित पवार म्हणाले, लोकसभा निवडणुकीत मी बारामतीतून असा उमेदवार उभा करणार आहे ज्याने यापूर्वी कधीही निवडणूक लढवली नाही. यामुळे तो उमदेवार कोण असणार? याकडे आता संपूर्ण राज्याचे लक्ष लागले आहे.
