फलटण (प्रतिनिधी) फलटण उपजिल्हा रुग्णालयातील महिला डॉक्टर आत्महत्येप्रकरणी काही जण चुकीच्या माहितीच्या आधारे माझ्यावर आरोप करत आहेत. अशा आरोपांना अयोग्य किंवा आक्रमक पद्धतीने प्रतिसाद देऊ नका, तर संविधानिक मार्गाने, संस्कृती आणि परंपरा जपत उत्तर द्या, असे आवाहन माजी खासदार रणजितसिंह नाईक-निंबाळकर यांनी आपल्या कार्यकर्त्यांना आणि सहकाऱ्यांना केले आहे.
सुरू असलेल्या आरोप-प्रत्यारोपांच्या पार्श्वभूमीवर रणजितसिंह नाईक-निंबाळकर म्हणाले की, गेल्या काही दिवसांत माझ्यावर विविध माध्यमांतून निराधार आरोप केले जात आहेत. हे सर्व आरोप चुकीच्या माहितीवर आधारित असून, वास्तव वेगळे आहे, हे सर्वांना माहीत आहे.
राष्ट्रवादी काँग्रेसचे नेते मेहबूब शेख असोत किंवा शिवसेनेच्या प्रवक्त्या सुषमा अंधारे असोत — त्यांच्यावर एकेरी पद्धतीने भाष्य करू नका. त्यांच्या विधानांना संविधानिक मार्गाने उत्तर द्या. त्यानंतरही समाधान न झाल्यासही अयोग्य भाषेत प्रतिक्रिया देऊ नये, असे त्यांनी स्पष्ट केले.
“आपल्याला बदला घ्यायचा नाही, तर बदल घडवायचा आहे. गेल्या वर्षभर आपण ज्या संयमाने आणि शिस्तीने काम केले, त्याच पद्धतीने पुढेही वागावे,” असे आवाहन रणजितसिंह नाईक-निंबाळकर यांनी आपल्या समर्थकांना केले.
