बारामती :- इंदापूर तालुक्यातील भवानीनगर येथील श्री छत्रपती सहकारी साखर कारखान्याच्या आगामी निवडणुकीसंदर्भात महत्त्वाचा राजकीय निर्णय घेण्यात आला असून, ही निवडणूक बिनविरोध करण्याचा निर्धार उपमुख्यमंत्री अजित पवार यांनी केला आहे. त्याचबरोबर कारखान्याच्या अध्यक्षपदी पृथ्वीराज जाचक यांची पुन्हा नियुक्ती करण्याचा निर्णयही त्यांनी घेतला आहे. याला आता खासदार सुप्रिया सुळे यांनीदेखील जाहीरपणे पाठिंबा दर्शवला आहे.
खासदार सुळे यांनी आज लासुर्णे येथे पृथ्वीराज जाचक यांच्या निवासस्थानी भेट देत त्यांच्याशी सविस्तर चर्चा केली. त्यानंतर त्यांनी माध्यमांशी बोलताना सांगितले की, “शेतकऱ्यांच्या हितासाठी राजकारण बाजूला ठेवून जर एकत्रितपणे निर्णय घेतला जात असेल, तर आम्ही त्याला विरोध करणार नाही. पृथ्वीराज जाचक यांच्या नेतृत्वात जर कारखान्याचा कारभार चालणार असेल, तर त्याचा लाभ निश्चितच शेतकऱ्यांना होईल.”
गेल्या काही काळात श्री छत्रपती साखर कारखाना आर्थिक अडचणीत सापडला होता. या पार्श्वभूमीवर कारखान्याला पुन्हा उभारी देण्यासाठी अजित पवार यांनी पुढाकार घेत सर्वपक्षीय बैठकीत बिनविरोध निवडणुकीसाठी एकजूट होण्याचं आवाहन केलं. सहकार क्षेत्रातील अनुभवी व्यक्तिमत्त्व असलेल्या पृथ्वीराज जाचक यांच्यावर पुन्हा एकदा विश्वास ठेवत त्यांच्याकडेच कारखान्याची धुरा देण्याचा निर्णय घेण्यात आला.
सुळे यांच्या पाठिंब्यानंतर आता ही निवडणूक बिनविरोध होण्याची शक्यता अधिकच बळावली असून, कारखान्याच्या नव्या पर्वाची सुरुवात पृथ्वीराज जाचक यांच्या नेतृत्वात होणार आहे.
— साहस Times
